“Daryo” nashrida Antikorrupsiya agentligi Yakkasaroy hokimini “tadbirkorlik bilan shug‘ullanyapti”, dedi. Hokimlik buni rad etmoqda” nomli material eʼlon qilingan edi. Yakkasaroy tumani hokimini Sanico Group va “Uv-Maks” jamiyati egaligidan 13-iyun kuni chiqarilgani, lekin Korrupsiyaga qarshi kurashish agentligi bu maʼlumotlarni 20-iyul kuni tarqatgani aytilgan.
Korrupsiyaga qarshi kurashish agentligi axborot xizmati “Daryo”ga holat bo‘yicha batafsil tushuntirish berdi.
Korrupsiyaga qarshi kurashish agentligi tomonidan davlat boshqaruv organlari va davlat ishtirokidagi xo‘jalik yurituvchi subyektlarda korrupsiyaga qarshi kurashish ishlarining holati o‘rganilganda ayrim rahbar mansabdor shaxslar tomonidan qonunbuzilishi holatlariga yo‘l qo‘yilgani aniqlangan.
Jumladan:
- Milliy antidoping agentligi direktori A.Sadikov “Total Oil” MCHJ;
- “Axborotlashtirish Bosh markazi” DUK rahbari D.Sarixojayev “Musammo” MCHJ;
- Andijon viloyati Bo‘ston tumani hokimi S.Nosirova “Sabina issiq nonlari 777” va “Ko‘mir Sanoati” MCHJlar;
- Navoiy viloyati Qiziltepa tumani hokimi U.Fayziyev “Zarafshan Golden Group” va “Zarafshon Grand Invest” MCHJlar, “G‘ani Bobo Chorvasi” fermer xo‘jaligi;
- Toshkent shahar Yakkasaroy tumani hokimi A.Sayfutdinov “Sanico Group” va “Uv-Maks” MCHJlar;
- Ipakchilik va jun sanoatini rivojlantirish qo‘mitasi rahbari B.Sharipov “Karomat Oyijon-Surxon” fermer xo‘jaligida taʼsischi sifatida faoliyat yuritib kelayotganligi maʼlum bo‘ldi.
Aniqlangan holatlar bo‘yicha mazkur davlat organlari va tashkilotlari, shuningdek, ularning yuqori turuvchi idoralariga agentlik tomonidan taqdimnomalarga asosan
- Toshkent shahar korrupsiyaga qarshi ichki nazorat bo‘limi tomonidan 22-iyun kuni Agentlikka taqdim etilgan javob xatiga ko‘ra, Yakkasaroy tumani hokimi A.Sayfutdinovning Sanico Group va “Uv-Maks” MCHJlardagi;
- Markaziy bank tomonidan 16-iyun kuni agentlikka yuborilgan xatiga asosan “Axborotlashtirish bosh markazi” DUK rahbari D.Sarixojayevning “Musammo” MCHJdagi;
- Milliy antidoping agentligi tomonidan 16-iyun kuni Agentlikka yuborilgan xatiga ko‘ra Agentlik direktori A.Sadikovning “Total Oil” MCHJdagi taʼsischiligi tugatilgan.
Andijon viloyati Bo‘ston tumani hokimi S.Nosirovaning “Sabina issiq nonlari 777” va “Ko‘mir sanoati” MCHJlardagi taʼsischiligi yuzasidan viloyat hokimligiga kiritilgan taqdimnoma bo‘yicha agentlikka javob xati kelib tushmagan, biroq o‘tkazilgan monitoring davomida S.Nosirovaning ushbu firmalardagi taʼsischiligi tugatilganligi oydinlashdi.
Ipakchilik va jun sanoatini rivojlantirish qo‘mitasi rahbari B.Sharipovning “Karomat oyijon Surxon” fermer xo‘jaligida taʼsischi sifatida faoliyat yuritib kelayotgani yuzasidan 2023-yil 20-iyun kuni Qishloq xo‘jaligi vazirligiga kiritilgan taqdimnoma bo‘yicha ham haligacha agentlikka javob xati taqdim etilmagan.
Izoh (0)