O‘zbekiston xalqaro aeroportlarining uchib ketish yo‘nalishida ikki yo‘lakli (“yashil” va “qizil”) tizim tugatildi. Bu haqda Davlat bojxona qo‘mitasi matbuot xizmati xabar berdi.
Vazirlar Mahkamasi qarori bilan hukumatning 2017-yildagi “O‘zbekiston Respublikasi bojxona chegarasi orqali o‘tkazish punktlarida ikki yo‘lakli tizimni qo‘llash tartibi to‘g‘risidagi nizomni tasdiqlash haqida”gi qaroriga bojxona maʼmurchiligini soddalashtirishga qaratilgan o‘zgartirish va qo‘shimchalar kiritildi. Mazkur qaror bilan 2018-yilning 1-yanvaridan boshlab respublikaning barcha xalqaro aeroportlaridagi bojxona chegaralari orqali o‘tkazish punktlarida ikki yo‘lakli tizim ishga tushirilgandi.
O‘zbekiston prezidentining “Bojxona maʼmuriyatchiligini yanada takomillashtirishga doir qo‘shimcha chora-tadbirlar to‘g‘risida”gi farmoni bilan xalqaro aeroportlarning uchib ketish yo‘nalishida “masofaviy bojxona nazorati” (maxsus ajratilgan joylarda vizual kuzatuvni amalga oshirish orqali) tizimi joriy etilgan.
“Shu munosabat bilan endilikda xalqaro aeroportlarning uchib ketish yo‘nalishida ikki yo‘lakli (‘yashil’ va ‘qizil’) tizim tugatildi”, — deya ta’kidlanadi xabarda.
Masofaviy bojxona nazorati — xalqaro aeroportlar orqali uchib ketayotgan yo‘lovchilarni maxsus ajratilgan joylarda xavfni boshqarish tizimidan foydalangan holda tanlab olish tamoyili asosida hamda masofaviy vizual kuzatuvni amalga oshirish orqali bojxona nazorati va rasmiylashtiruvidan o‘tkazishni taʼminlaydigan tizim.
“Xalqaro aeroportlarining uchib ketish yo‘nalishida jismoniy shaxslarning bojxona deklaratsiyasini rasmiylashtirish va ularga bojxona konunchiligi bo‘yicha tushuntirishlar berish uchun yo‘lovchilar harakatiga taʼsir qilmaydigan alohida bojxona rasmiylashtiruvi joyi tashkil etiladi”, — deyiladi xabarda.
Bojxona rasmiylashtiruvi joyi davlat tilida, rus va ingliz tillarida “Bojxona”, “Tamojnya” va “Customs” yozuvlari bo‘lgan maxsus grafik belgi bilan belgilanadi.
Qaror bilan O‘zbekiston xalqaro aeroportlarining uchib ketish joyidagi masofaviy bojxona nazorati tizimiga qo‘yiladigan talablar belgilab olingan.
Izoh (0)