O‘zbekiston va Hindiston Samarqandda zamonaviy saraton markazi tashkil etishni rejalashtirmoqda, deb xabar berdi “Dunyo” AA.
Ma‘lum qilinishicha, O‘zbekiston elchixonasi, Samarqand viloyati hokimligi va Hindistonning Stemz Healthcare Pvt Ltd kompaniyasi vakillari o‘rtasida videokonferensaloqa shaklida muzokaralar o‘tkazilib, Samarqand shahrida zamonaviy onkologiya markazini barpo etish bo‘yicha qo‘shma loyihani amalga oshirish masalalari muhokama qilindi.
Samarqand viloyati hokimi o‘rinbosari Rustam Qobilov turli yo‘nalishlarda, jumladan tibbiyot sohasida samarali xalqaro hamkorlik uchun yaratilgan qulay muhit haqida ma’lumot taqdim qildi. Bunda viloyat tibbiyot tizimi imkoniyatlari, shifo maskanlari va mutaxassislarning salohiyatiga alohida e’tibor qaratildi.
Stemz Healthcare Pvt Ltd kompaniyasi boshqaruvchi direktori Raman Sodhi o‘zbekistonlik hamkasblar bilan hamkorlik qilishdan manfaatdor ekanini, bo‘lajak qo‘shma klinikani tashkil qilish bilan bog‘liq masalalar o‘rganilayotganini ma’lum qildi.
Onkologiya markazi zamonaviy va ilg‘or texnologiyalar bilan ta’minlanishi, uning faoliyatiga yuqori malakali mutaxassislar jalb etilishi, o‘zbekistonlik tibbiyotchilarning kasb mahoratini oshirish bo‘yicha tizimli ishlar yo‘lga qo‘yilishi qayd etildi. Hind kompaniyasi vakillaridan iborat delegasiyaning Samarqand shahriga yaqin muddatlarda safarini tashkil qilish bo‘yicha kelishib olindi.
Bugungi kunda Samarqand shahrida Zarmed Pratiksha Hospital Group O‘zbekiston—Hindiston ko‘p tarmoqli tibbiyot markazi faoliyat ko‘rsatmoqda.
Izoh (0)