Ўзбекистон халқаро аэропортларининг учиб кетиш йўналишида икки йўлакли (“яшил” ва “қизил”) тизим тугатилди. Бу ҳақда Давлат божхона қўмитаси матбуот хизмати хабар берди.
Вазирлар Маҳкамаси қарори билан ҳукуматнинг 2017 йилдаги “Ўзбекистон Республикаси божхона чегараси орқали ўтказиш пунктларида икки йўлакли тизимни қўллаш тартиби тўғрисидаги низомни тасдиқлаш ҳақида”ги қарорига божхона маъмурчилигини соддалаштиришга қаратилган ўзгартириш ва қўшимчалар киритилди. Мазкур қарор билан 2018 йилнинг 1 январидан бошлаб республиканинг барча халқаро аэропортларидаги божхона чегаралари орқали ўтказиш пунктларида икки йўлакли тизим ишга туширилганди.
Ўзбекистон президентининг “Божхона маъмуриятчилигини янада такомиллаштиришга доир қўшимча чора-тадбирлар тўғрисида”ги фармони билан халқаро аэропортларнинг учиб кетиш йўналишида “масофавий божхона назорати” (махсус ажратилган жойларда визуал кузатувни амалга ошириш орқали) тизими жорий этилган.
“Шу муносабат билан эндиликда халқаро аэропортларнинг учиб кетиш йўналишида икки йўлакли (‘яшил’ ва ‘қизил’) тизим тугатилди”, — дея таъкидланади хабарда.
Масофавий божхона назорати — халқаро аэропортлар орқали учиб кетаётган йўловчиларни махсус ажратилган жойларда хавфни бошқариш тизимидан фойдаланган ҳолда танлаб олиш тамойили асосида ҳамда масофавий визуал кузатувни амалга ошириш орқали божхона назорати ва расмийлаштирувидан ўтказишни таъминлайдиган тизим.
“Халқаро аэропортларининг учиб кетиш йўналишида жисмоний шахсларнинг божхона декларациясини расмийлаштириш ва уларга божхона конунчилиги бўйича тушунтиришлар бериш учун йўловчилар ҳаракатига таъсир қилмайдиган алоҳида божхона расмийлаштируви жойи ташкил этилади”, — дейилади хабарда.
Божхона расмийлаштируви жойи давлат тилида, рус ва инглиз тилларида “Божхона”, “Таможня” ва “Customs” ёзувлари бўлган махсус график белги билан белгиланади.
Қарор билан Ўзбекистон халқаро аэропортларининг учиб кетиш жойидаги масофавий божхона назорати тизимига қўйиладиган талаблар белгилаб олинган.
Изоҳ (0)