Iqtisodiyot va moliya vazirligi “Fuqarolar uchun budjet” nashrining 2022-yildagi ijrosi maʼlumotlarini eʼlon qildi. Unda O‘zbekiston davlat qarzi uchun qilingan xarajatlar miqdori ham ko‘rsatib o‘tilgan.
Davlat budjetining 2022-yil xarajatlari 2021-yilga nisbatan 48,4 trillion so‘m oshgan holda 236,7 trillion so‘mga ijro etilgan. Dastlabki hisob-kitoblarga ko‘ra, o‘tgan yilgi budjet taqchilligi yalpi ichki mahsulotning qariyb 4 foizini tashkil qilgan.
2022-yilda davlat qarziga xizmat ko‘rsatish xarajatlari (foiz xarajatlari) uchun budjetdan 3 trillion 528 milliard so‘m mablag‘ yo‘naltirilgan. Taqqoslash uchun, 2021-yilda davlat qarzi (kreditlar) foizlariga 2 trillion 238 milliard so‘m to‘langan.
Sobiq moliya vaziri o‘rinbosari Odilbek Isoqov o‘tgan yili Samarqandda bo‘lib o‘tgan iqtisodiy forum doirasida “Daryo” muxbiriga intervyu berib, 2022-yildagi kreditlar (davlat tashqi qarzlari) asosan xalqaro moliya institutlari, jumladan, Jahon banki, Osiyo taraqqiyot banki va boshqalardan jalb qilinganini aytgan.
“Hozirda davlat kreditlari budjet qonunida ko‘rsatilgan miqdorda jalb qilinmoqda. Bu yil (2022-yil–tahr.) 2 milliard dollar tashqi qarz investitsiya loyihalariga, 2,5 milliard dollarlik qarzlar budjetni qo‘llab-quvvatlash uchun yo‘naltirilmoqda”, — degan mutaxassis.
Eslatib o‘tamiz, O‘zbekiston davlat qarzi 2022-yilda 29,2 mlrd dollarni tashkil etib, yalpi ichki mahsulotga nisbatan 36,4 foizga yetgan. Bu mamlakat davlat qarzining shu paytga qadar eng yuqori ko‘rsatkichi hisoblanadi.
Avvalroq “Davlat qarzi to‘g‘risida”gi qonun prezident tomonidan imzolangani xabar qilingandi. Qonunga ko‘ra, davlat qarzining eng yuqori miqdori yalpi ichki mahsulotning yillik prognoz ko‘rsatkichiga nisbatan 60 foizdan oshmasligi kerak.
Izoh (0)