Toshkent viloyatida turizmni rivojlantirish uchun dam olish maskanlariga vertolyotda borib-kelish imkoniyati yaratildi. Bu haqda OAV vakillari uchun Bo‘stonliq tumaniga tashkil etilgan press-turda maʼlum bo‘ldi.
Qayd etilishicha, Uzbekistan Airways AJga qarashli xususiy tadbirkorlik subyekti Bo‘stonliqdagi Heaven‘s Garden dam olish maskaniga vertolyot qatnovini yo‘lga qo‘ygan.
Toshkent xalqaro aeroportidan yo‘lga chiqqan vertolyot Bo‘stonliq tumanidagi dam olish maskaniga taxminan 20-25 daqiqada yetib keladi. Bir martalik parvoz vaqtida 5 nafar yo‘lovchini manzilga olib borib, yana 5 nafar yo‘lovchini ortga olib qaytadi. Shunday qilib, har bir vertolyot kuniga 7-8 ta parvozni amalga oshiradi, — deydi Uzbekistan Airways AJga qarashli xususiy korxona direktori Sardor Nurmuhammedov.
Masʼulning maʼlumot berishicha, vertolyotdagi parvoz narxi har bir kishi uchun 1 million so‘mni tashkil qiladi.
Heaven’s Garden dam olish maskani rahbari Abdurasul Abduxalilovning maʼlumot berishicha, prezidentning tadbirkorlarga yaratib berayotgan imkoniyati sabab, shaxsan uning rahbarligidagi tadbirkorlik subyektining daromadi 100 baravarga o‘sgan.
Yurtimizda tadbirkorlarga berilayotgan imkoniyatlar tadbirkorlarning ishi yurishib, rivojlanishiga turtki bo‘lmoqda. Davlat rahbari yaratib berayotgan imkoniyatlar shu darajada ko‘pki, hali birinchi imkoniyatni hazm qilmasimizdan ikkinchi imkoniyat yaratiladi. Biz bu imkoniyatlardan foydalansak, rivojlanamiz, — deydi tadbirkor.
Tadbirkor Abdurasul Abduxalilovning maʼlum qilishicha, u dastlab tadbirkorligini 10 kishi bilan boshlagan bo‘lib, ayni kunda ishchilari soni 1000 nafardan ortgan.
Bizga ishga kelgan yoshlarning hech biri o‘qimagan. Ularning qo‘lidan hech qanday kasb-hunar kelmasdi. Ko‘pchiligi turli xil daftarlarda turardi. Ular dastlab ovqat tashuvchi bo‘lib ishladi. Keyin ofitsiant bo‘lishdi, keyin katta ofitsiant va menejerlik darajasigacha ko‘tarilishdi. Maoshlari ham kuniga 100 ming so‘mdan, 150 ming, 250 ming so‘mgacha, bugungi kunga kelib esa 500 ming so‘mgacha oshdi, — deydi tadbirkor.
Toshkent viloyati hokimligi axborot xizmati xodimi Asqar Ismoilovning maʼlumot berishicha, Bo‘stonliq tumaniga bir yilda 9 million kishi dam olishga keladi.
Bo‘stonliq tumanida 5112 ta dam olish uyi va dala hovlilari, 584 ta joylashtirish vositalari mavjud. Tumanda 2020—2022-yillar davomida 65,1 million dollar investitsiya hisobiga 21 ta 2189 o‘rinli yirik zamonaviy mehmonxona va dam olish maskanlari, 6 ta restoran, rafting eko-turizm loyihasi, 6 ta yirik savdo do‘konlari 1 ta xususiy klinika qurildi. 65 ta oilaviy mehmon uylari va uzunligi 3000 metrli 2400 kishini tashish quvvatiga ega bo‘lgan “Amirsoy Ekspress” hamda uzunligi 1600 metr bo‘lgan 2400 kishi quvvatiga ega “Chinorkent” osma dor yo‘llari ishga tushirildi. 2022-yilda tumanga yiliga jami 5 million 891 ming nafar sayyoh tashrif buyurgan bo‘lsa bugungi kunga kelib ularning soni 9 millionga yetdi, — deydi Asqar Ismoilov.
Abdurasul Abduxalilovga ko‘ra, ular Xitoy davlatidagi tadbirkorlar bilan hamkorlik qilib, yiliga 100 ming nafar xitoylikni O‘zbekistonga olib kelib, sayyohat qildirish bo‘yicha kelishuvga erishgan.
Xitoylik hamkorlar bilan dam olish maskani orqasida 15 million dollarlik attraksionlar bog‘ini barpo qilishni reja qilganmiz, — deydi u.
Izoh (0)