Toshkent shahrida “Zo‘rTV” jurnalisti va operatori kalataklangani, operator ayni paytda shifoxonaga yotqizilgani haqida xabar berilgandi. AOKA mazkur holat yuzasidan Bosh prokuratura va Ichki ishlar vazirligiga murojaat yo‘lladi. Bu haqda tashkilotning rasmiy munosabatida maʼlum qilingan.
Ijtimoiy tarmoqlar orqali 14-avgust kuni “Zo‘rTV” telekanali muxbiri va tasvirchisiga nisbatan xizmat faoliyati vaqtida haqoratli so‘zlar bilan tasvirga olish ishlariga to‘sqinlik qilgan va kuch ishlatgan videolavha keng muhokamalarga sabab bo‘lmoqda. “Jurnalistlik faoliyatini himoya qilish to‘g‘risida”gi qonunning 5-moddasiga muvofiq, jurnalist o‘z kasbiga doir faoliyatni amalga oshirish chog‘ida, jurnalist tekshiruvi o‘tkazish, mansabdor shaxs qabulida bo‘lish, maʼlumotlarni belgilangan tartibda yozib olish, shu jumladan, zarur texnika vositalaridan foydalangan holda yozib olish huquqiga ega ekanligi qatʼiy belgilab qo‘yilgan.
Shuningdek, ushbu qonunning 14-moddasida hamda Maʼmuriy va Jinoiy javobgarlik to‘g‘risidagi kodekslarda shaxsni haqorat qilganlik, qasddan yengil shikast yetkazganlik hamda mulkni qasddan nobud qilish yoki zarar yetkazish uchun ham javobgarlik belgilangan. Agentlik jurnalistik faoliyatga to‘sqinlik qiluvchi va OAV xodimlariga nisbatan bo‘ladigan har qanday tazyiqni keskin qoralaydi. Shunga ko‘ra, agentlik o‘z vakolat doirasidan kelib chiqib, bo‘lib o‘tgan voqelikka huquqiy baho berish va adolatli qaror qabul qilishlarini so‘rab Ichki ishlar vazirligi hamda Bosh prokuraturaga rasmiy murojaat yo‘lladi.
AOKA huquqni muhofaza qiluvchi organlar tomonidan jarayon o‘rganilishi hamda xizmat tekshiruvlari natijalarini diqqat bilan kuzatib boradi va bu ishni nazoratga oladi. Ishonamizki, Ichki ishlar vazirligi va Bosh prokuratura holatga huquqiy baho berishda qonunchilik normalariga zid xatti-harakatlarni amalga oshirgan shaxslarga nisbatan tegishli choralarni ko‘radi, — deyiladi tashkilotning rasmiy munosabatida.
“Daryo” bilan suhbatda bo‘lgan kanal jurnalisti voqea paytida telekanal kamerasi va operatorning burni singanini maʼlum qilgandi.
Operatorimiz Sardorbek Yo‘ldoshevning burnini sindirishdi. Ayni paytda operatorimiz tez yordamda shifoxonaga olib ketilgan. Menda ham jarohatlar bor. Shifokorlar tibbiy ko‘rik zarur dedi. Ammo telekanal kamerasi, mikrofonini ishxonaga yetkazishim kerak edi. Shu sabab men barcha ish qurollarni olib ishxonaga qaytdim, — degandi u.
“Zo‘rTV” jurnalisti Nurzodbek Vohidovning qo‘shimcha qilishicha, voqeadan so‘ng hudud profilaktika inspektori ularga qo‘ng‘iroq qilib, voqea haqida so‘ragan.
Izoh (0)