Иқтисодиёт ва молия вазирлиги “Фуқаролар учун бюджет” нашрининг 2022 йилдаги ижроси маълумотларини эълон қилди. Унда Ўзбекистон давлат қарзи учун қилинган харажатлар миқдори ҳам кўрсатиб ўтилган.
Давлат бюджетининг 2022 йил харажатлари 2021 йилга нисбатан 48,4 триллион сўм ошган ҳолда 236,7 триллион сўмга ижро этилган. Дастлабки ҳисоб-китобларга кўра, ўтган йилги бюджет тақчиллиги ялпи ички маҳсулотнинг қарийб 4 фоизини ташкил қилган.
2022 йилда давлат қарзига хизмат кўрсатиш харажатлари (фоиз харажатлари) учун бюджетдан 3 триллион 528 миллиард сўм маблағ йўналтирилган. Таққослаш учун, 2021 йилда давлат қарзи (кредитлар) фоизларига 2 триллион 238 миллиард сўм тўланган.
Собиқ молия вазири ўринбосари Одилбек Исоқов ўтган йили Самарқандда бўлиб ўтган иқтисодий форум доирасида “Дарё” мухбирига интервью бериб, 2022 йилдаги кредитлар (давлат ташқи қарзлари) асосан халқаро молия институтлари, жумладан, Жаҳон банки, Осиё тараққиёт банки ва бошқалардан жалб қилинганини айтган.
“Ҳозирда давлат кредитлари бюджет қонунида кўрсатилган миқдорда жалб қилинмоқда. Бу йил (2022 йил–таҳр.) 2 миллиард доллар ташқи қарз инвестиция лойиҳаларига, 2,5 миллиард долларлик қарзлар бюджетни қўллаб-қувватлаш учун йўналтирилмоқда”, — деган мутахассис.
Эслатиб ўтамиз, Ўзбекистон давлат қарзи 2022 йилда 29,2 млрд долларни ташкил этиб, ялпи ички маҳсулотга нисбатан 36,4 фоизга етган. Бу мамлакат давлат қарзининг шу пайтга қадар энг юқори кўрсаткичи ҳисобланади.
Аввалроқ “Давлат қарзи тўғрисида”ги қонун президент томонидан имзолангани хабар қилинганди. Қонунга кўра, давлат қарзининг энг юқори миқдори ялпи ички маҳсулотнинг йиллик прогноз кўрсаткичига нисбатан 60 фоиздан ошмаслиги керак.
Изоҳ (0)