Toshkent shahrida 2030-yilda kanallar bo‘yida tashkil etilgan sayilgohlar uzunligi 150 kilometrga yetadi. Bu haqda poytaxt hokimligi xabar berdi.
Qayd etilishicha, kanallar bo‘ylarida sayilgohlarni tashkil etish ishlari 2018-yilda boshlangan. Hozirda poytaxtdan oqib o‘tuvchi turli kanallar atrofida 42 kilometr uzunlikda ko‘ngilli sayr qilish maskanlari barpo qilindi.
Bu jarayonda kanallarning qirg‘oqlarini mustahkamlash, chiqindilardan tozalash ishlari bajarilib, o‘rindiqlar, chiqindi qutilari va zamonaviy tungi yoritish chiroqlari o‘rnatildi. Piyodalar va velosiped yo‘laklari tashkil qilindi.
“Bu ishlar izchil davom ettirilib, kanallar bo‘yidagi sayilgohlar uzunligi 2024-yilda 50 kilometr, 2025-yilda 60 kilometr, 2026-yilda 75 kilometr, 2027-yilda 90 kilometr, 2028-yilda 110 kilometr, 2029-yilda 130 kilometr va 2030-yilda 150 kilometrga yetkaziladi”, — deyiladi xabarda.
Sayilgohlarda aholi ko‘ngilli madaniy hordiq chiqarishi uchun bolalar o‘yingohlari, savdo va boshqa xizmat ko‘rsatish shoxobchalari tashkil etiladi.
Poytaxtdagi bir qator kanallar atrofini sayilgohlarga aylantirish ishlari davom ettirilishi haqida Xalq deputatlari Toshkent shahar kengashining 75-sessiyasida ma’lum qilingandi.
Ma'lumotlarga ko‘ra, bugungi kunda poytaxtda jami 128 ta kanal va kollektor mavjud bo‘lib, ularning 16 tasi magistral, 24 tasi xo‘jaliklararo va 80 tasi ichki xo‘jalik kanallari hisoblanadi, 8 tasi esa kollektorlardan iborat, ularning umumiy uzunligi 408 kilometrga teng.
Izoh (0)