Тошкент шаҳрида 2030 йилда каналлар бўйида ташкил этилган сайилгоҳлар узунлиги 150 километрга етади. Бу ҳақда пойтахт ҳокимлиги хабар берди.
Қайд этилишича, каналлар бўйларида сайилгоҳларни ташкил этиш ишлари 2018 йилда бошланган. Ҳозирда пойтахтдан оқиб ўтувчи турли каналлар атрофида 42 километр узунликда кўнгилли сайр қилиш масканлари барпо қилинди.
Бу жараёнда каналларнинг қирғоқларини мустаҳкамлаш, чиқиндилардан тозалаш ишлари бажарилиб, ўриндиқлар, чиқинди қутилари ва замонавий тунги ёритиш чироқлари ўрнатилди. Пиёдалар ва велосипед йўлаклари ташкил қилинди.
“Бу ишлар изчил давом эттирилиб, каналлар бўйидаги сайилгоҳлар узунлиги 2024 йилда 50 километр, 2025 йилда 60 километр, 2026 йилда 75 километр, 2027 йилда 90 километр, 2028 йилда 110 километр, 2029 йилда 130 километр ва 2030 йилда 150 километрга етказилади”, — дейилади хабарда.
Сайилгоҳларда аҳоли кўнгилли маданий ҳордиқ чиқариши учун болалар ўйингоҳлари, савдо ва бошқа хизмат кўрсатиш шохобчалари ташкил этилади.
Пойтахтдаги бир қатор каналлар атрофини сайилгоҳларга айлантириш ишлари давом эттирилиши ҳақида Халқ депутатлари Тошкент шаҳар кенгашининг 75-сессиясида маълум қилинганди.
Маълумотларга кўра, бугунги кунда пойтахтда жами 128 та канал ва коллектор мавжуд бўлиб, уларнинг 16 таси магистрал, 24 таси хўжаликлараро ва 80 таси ички хўжалик каналлари ҳисобланади, 8 таси эса коллекторлардан иборат, уларнинг умумий узунлиги 408 километрга тенг.
Изоҳ (0)