O‘zbekiston mudofaa vaziri general-leytenant Bahodir Qurbonov boshchiligidagi harbiy delegatsiya Qozog‘istonning “Oymasha” poligonida o‘tkazilayotgan O‘zbekiston va Qozog‘iston Qurolli kuchlari maxsus bo‘linmalari hamkorligidagi maxsus-taktik o‘quvlarini bevosita kuzatdi. Bu haqda vazirlik matbuot xizmati xabar berdi.
Qayd etilishicha, har ikki davlatning mudofaa vazirlari harbiy poligon bo‘ylab harbiy xizmatchilarning 10 dan ortiq o‘quv nuqtalarida o‘tkazayotgan maxsus-taktik o‘quvlarini kuzatgan, bevosita unda ishtirok etdi va jangovar qurollardan o‘q uzgan.
O‘quv rejasiga muvofiq, harbiy xizmatchilar tezkor kuch va vositalar bilan hamkorlikda shartli dushmanni yakson etish bo‘yicha harakatlarni amalga oshirgan. O‘quvlar davomida maxsus bo‘linmalar uchuvchisiz uchish qurilmalaridan foydalangan holda razvedka-qidiruv harakatlarini olib borgan.
.jpg)
Shu bilan birga, O‘zbekiston harbiy delegatsiyasi Aqtau shahrida joylashgan harbiy qismdagi sharoitlar bilan yaqindan tanishgan, dengiz flotidagi qo‘shinlarning kemani qo‘lga olish va hujum qilish bo‘yicha taktik mashg‘ulotlarini kuzatgan.
“Mashg‘ulotlar yakunida mudofaa vazirlari harbiy xizmatchilarning jangovar qobiliyatlarini yuqori baholab, har ikki davlatning harbiy xizmatchilariga jangovar hamdo‘stlikni mustahkamlashdagi xizmatlari uchun ko‘krak nishonlarini topshirdi”, — deyiladi xabarda.
May oyida Toshkent harbiy okrugining “Angren” dala o‘quv maydonida O‘zbekiston va Qozog‘iston Qurolli kuchlari maxsus bo‘linmalari hamkorligidagi “Qalqon-2023” maxsus-taktik o‘quvlarining asosiy fazasi bo‘lib o‘tgandi.
Izoh (0)