O‘zbekiston sog‘liqni saqlash vaziri tomonidan 8-avgust kuni o‘tkazilgan yig‘ilishda Andijon tibbiyot institutining qator rahbarlari lavozimidan ozod etildi.
Vazirlik matbuot xizmatining xabar qilishicha, yig‘ilishda Andijon davlat tibbiyot institutidagi korrupsion holatlar tanqid ostiga olinib, oliy o‘quv yurti masʼullariga bu borada jiddiy eʼtirozlar bildirildi.
Yakunda institut bosh hisobchisi A.Rahmonov, Kadrlar bo‘limi boshlig‘i D.Nazarova, Reja-moliya bo‘limi boshlig‘i A.Ahmedova, Taʼlim sifatini nazorat qilish bo‘limi boshlig‘i X.Aliyev, O‘quv-uslubiy boshqarma boshlig‘i Q.Yusupov zimmasiga yuklatilgan vazifalarni lozim darajada bajarmagani, o‘z faoliyatida jiddiy kamchilik va qonun buzilishi holatlariga yo‘l qo‘ygani sababli egallab turgan lavozimidan ozod qilindi.
Shuningdek, institut rektori M.Madazimovni korrupsion holatlarni yuzaga kelishiga sabab bo‘luvchi holat va shart-sharoitlarni bartaraf etishda qatʼiyatsizlik ko‘rsatgani va korrupsiyaga oid jinoyat sodir etilishiga yo‘l qo‘ygani sababli egallab turgan lavozimidan ozod etish bo‘yicha taklif tayyorlash belgilandi.
Iyul oyida Andijon davlat tibbiyot instituti dekani o‘rinbosari A.N. hamda kafedra assistenti K.X. fuqarolarni o‘qishga kiritib qo‘yishni vaʼda qilib, ulardan pora olgan vaqtda qo‘lga olingandi. Sog‘liqni saqlash vaziri buyrug‘i bilan ushbu institut xodimlari tomonidan sodir etilgan noqonuniy xatti-harakatlarni o‘rganish yuzasidan vazirlikning ishchi guruhi tuzilib, xizmat tekshiruvi tayinlangandi.
Izoh (0)