O‘zbekistonda tibbiyotga ajratiladigan yillik mablag‘ hajmi ikki barobar oshiriladi. Bu haqda jamoatchilik muhokamasi uchun e’lon qilingan “O‘zbekiston-2030” strategiyasi loyihasida ko‘zda tutilgan.
Hujjatda aholi salomatligini ta’minlash bo‘yicha islohotlar keltirilgan bo‘lib, unga ko‘ra, quyidagilarni amalga oshirish rejalashtirilgan:
- aholining o‘rtacha umr davomiyligini oshirish;
- tug‘ilishdan kutilayotgan umr ko‘rish davomiyligini 78 yoshga yetkazish;
- budjetdan tibbiyotga ajratiladigan yillik mablag‘ hajmini ikki barobar oshirish;
- onkologiya, yurak-qon tomir, diabet, nafas yo‘llari va yuqumli kasalliklar bo‘yicha erta o‘limni 2,5 barobar kamaytirish;
- sil kasalligi bilan kasallanish darajasini 100 ming aholiga nisbatan hozirgi 34 nafardan keskin kamaytirish.
Aholiga birlamchi tibbiy xizmatlarni yanada yaqinlashtirish maqsadida 700 ta poliklinika barpo etish, 28 ming shifo o‘rinlarini yaratish, 16 ming shifokor shtatlarini tashkil etish ko‘zda tutilmoqda.
Respublikada gemodializ bo‘limlari soni ikki barobarga ko‘paytiriladi. 350 ming nafar diabet, 1,5 million yurak-qon tomir kasalligi bor bemorlarni davolash bilan to‘liq qamrab olinadi.
Tibbiy yordamga muhtoj aholining 70 foiz murojaatlarini birlamchi bo‘g‘inning o‘zida hal etishga erishiladi.
Izoh (0)