O‘zbekistonda nuroniylar malakali shifokorlar tomonidan bepul davolanadi, deb xabar bermoqda Sog‘liqni saqlash vazirligi axborot xizmati.
Unga ko‘ra, Sog‘liqni saqlash vazirligi yana bir yangi aksiyani eʼlon qildi. 1-avgustdan 1-sentyabrgacha “Keksalar salomatligi oyligi” tashkil etiladi. Bu davrda mamlakatdagi nuroniy otaxon va onaxonlar malakali shifokorlar tomonidan o‘zlari istiqomat qilayotgan hududda chuqurlashtirilgan tibbiy ko‘rikdan o‘tkaziladi.
Ushbu aksiya davomida tibbiy tekshiruv natijalariga muvofiq aniqlangan kasalliklar bo‘yicha davlat ko‘magida keksalarning sog‘lig‘ini mustahkamlash choralari ko‘riladi. Buning uchun dastlab tibbiy tekshiruvdan o‘tkaziladigan nuroniylar ro‘yxati shakllantirilib, ular yoshi, jinsi va salomatlik holatidan kelib chiqib, tegishli guruhlarga ajratiladi.
Shundan so‘ng aksiyaga jalb qilingan keksa yoshli insonlar maxsus tibbiy brigadalar tomonidan profilaktik va chuqurlashtirilgan tekshiruvlardan o‘tkaziladi. Tibbiy ko‘riklar yakunida:
- o‘tkir va surunkali xastaliklar qayd etilgan katta yoshli bemorlardan bir guruhi birlamchi bo‘g‘indagi kunduzgi shifoxonalarda ambulator sharoitda, statsionar yordamga muhtoj qatlam esa tuman, shahar hamda viloyat miqyosidagi tibbiyot muassasalarida davolanadi;
- yuqori texnologik ixtisoslashtirilgan tibbiy yordamga ehtiyoji bor keksa yoshli bemorlarga viloyat va respublika muassasalariga imtiyozli yo‘llanmalar taqdim etiladi.
O‘z navbatida olis va chekka hamda chegara hududlarda sayyor tibbiy brigadalar tomonidan chuqurlashtirilgan tekshiruvlar o‘tkaziladi.
Izoh (0)