Toshkent shahri Mirzo Ulug‘bek tumanida 32 yoshli ayol liftda qamalib, vafot etgani xabar qilingandi. Deputat Alisher Qodirov mazkur voqea haqida gapirib, Qurilish vazirligini tanqid qildi.
“Milliy tiklanish” va O‘zLIDEP fraksiyalarining qo‘shma yig‘ilishida deputatlar “Insonga eʼtibor va sifatli taʼlim yili”da amalga oshirishga oid davlat dasturining 2023-yil I yarim yildagi ijrosi yuzasidan adliya vazirining hisobotini eshitdi. Yig‘ilishda Alisher Qodirov yaqinda Toshkentda liftda qamalib qolib, hayotdan ko‘z yumgan ayol voqeasini eslab, XXI asrda lift ichida odam qolib ketib, vafot etishi mumkin emasligini taʼkidladi.
“Dunyo tajribasida buning oddiy yechimi liftga bitta SIM-karta o‘rnatish ekan. Yaʼni bu moslama yordam zarur bo‘lganda favqulodda vaziyatlar yoki boshqaruv punktiga xabar jo‘natadi. Qurilish vazirligi nahot shu narsani eʼtiborga olmayotgan bo‘lsa? Axir XXI asrda bunday voqealar bo‘lishi mumkin emas-ku”! – dedi fraksiya rahbari Qurilish vazirligi masʼullariga qarata.
Qayd etilishicha, vazirlik vakili “hozir bu masalani o‘rganyapmiz, ko‘rib chiqyapmiz” degan javobdan nariga o‘tmadi. Deputatlar ushbu masalada mutasaddi tashkilotlarga eʼtiroz bildirib, bunday holat takrorlanmasligi uchun nazoratni, talabni kuchaytirish, qancha mablag‘ zarur bo‘lsa ajratish kerakligini taʼkidladi.
Liftda qamalib vafot etgan ayol voqeasi
Ayol 24-iyul kuni soat taxminan 14:50 larda ko‘p qavatli uyning liftiga kirib, qaytib chiqmagan. 26-iyul kuni marhumaning yaqin qarindoshlari tomonidan ichki ishlar idorasiga bedarak yo‘qolganligi yuzasidan xabar berilgan, 27-iyul kuni esa uning jasadi lift ichidan topilgan. Marhuma 4 kun davomida lift ichida qolib ketgan.
Ijtimoiy tarmoqlarda tarqalgan xabarlarda odam o‘limi bilan yakunlangan ushbu ko‘ngilsizlikka elektr energiyasi ta’minotidagi doimiy uzilishlar sabab qilib ko‘rsatilgandi. Tekshirish davomida ushbu lift bir necha kundan buyon ishlamayotgani, oldin ham ishlamay qolishi holatlari ko‘p marotaba bo‘lgani haqida uy yashovchilari tomonidan tushuntirishlar berilgan. Shuningdek, voqea joyida xolis surishtiruv olib borgan OAV vakillari, jumladan, “Daryo” muxbirining videoreportajlarida ham o‘z tasdig‘ini topgan.
Sanoat xavfsizligi davlat qo‘mitasi “28-iyul kuni mutaxassislar tomonidan joyiga chiqib o‘rganilganida, lift qurilmasining xavfsizlik moslamalari ishchi holatdaligi yuzasidan birlamchi ko‘rik ishlari amalga oshirildi va ularni ishchi holatdaligi aniqlandi” deb rasmiy munosabat bildirgan.
Holat yuzasidan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bilan jinoyat ishi qo‘zg‘atildi.
Bosh prokuraturaning bildirishicha, tergov o‘tkazish yo‘li bilan qonuniy qaror qabul qilinishi ta’minlanadi.
Izoh (0)