O‘zbekiston dunyo bo‘yicha keng polosali (simli) internet tezligi reytingida 24 pog‘ona ko‘tarildi. Bu haqda Cable.co.uk nashri xabar berdi.
Maʼlum qilinishicha, respublika 2022-yilda dunyodagi simli internet tezligi bo‘yicha reytingda 155-o‘rinda bo‘lgan. Joriy yilda esa natijalar o‘zgarib, 131-o‘ringa ko‘tarilgan. Yaʼni o‘tgan yilgi reytingga nisbatan 24 pog‘onaga o‘sish bo‘lgan. Platformada O‘zbekistondagi simli internet tezligi 21,67 Mbit/s ekani qayd etilgan.
Mazkur yangilik haqida fikr bildirarkan, raqamli texnologiyalar vaziri Sherzod Shermatov O‘zbekistonda internet tezligini oshirish bo‘yicha ishlar ko‘pligiga urg‘u berdi.
“Jadvalga eʼtibor qaratsangiz, dunyodagi notinchlik tufayli aksariyat qo‘shni davlatlarda internet tezligi reytingida pasayish kuzatilgan. Biroq AKT sohasining rivojiga qaratilgan choralar natijasida O‘zbekiston 24 pog‘onaga ko‘tarilgan. Albatta, O‘zbekistonni IT xabga aylantirish yo‘lida internet tezligini oshirish bo‘yicha hali juda ko‘p ish qilishimiz kerak”, —deb yozgan vazir Telegram kanalida.
Reytingga ko‘ra, simli internet tezligi bo‘yicha O‘zbekiston qo‘shni Qozog‘iston va Qirg‘izistonni ortda qoldirgan. Xususan, ro‘yxatda Qirg‘iziston 142- o‘rin, Qozog‘iston 155-o‘rin, Turkmaniston 206-o‘rin, Tojikiston 214-o‘rindan joy olgan.
Reytingda Jersi oroli (264,52 Mbit/s), Lixtenshteyn(246,76 Mbit/s), Makao(231,40 Mbit/s), Islandiya (229,35 Mbit/s) va Gibraltar (206,27 Mbit/s) dunyodagi eng tez internetga ega hududlar sifatida yuqori o‘rinlardan joy olgan.
Dunyo bo‘yicha Afg‘oniston (1,71 Mbit/s), Yaman (1,79 Mbit/s), Suriya (2,30 Mbit/s), Sharqiy Timor (2,50 Mbit/s) va Ekvatorial Gvineya (2,70 Mbit/s) kabi davlatlar internet tezligi eng past bo‘lgan davlatlar ro‘yxatiga kirgan.
Izoh (0)