Haydovchilik guvohnomasini olish tartibi: imtihonlar, biroz oshgan to‘lovlar

Milliy haydovchilik guvohnomalarini berish xizmati Yagona interaktiv davlat xizmatlari portali (my.gov.uz) orqali Davlat yo‘l harakati xavfsizligi xizmati organlari yoki Davlat xizmatlari markazlari tomonidan ko‘rsatiladi.

Haydovchilik guvohnomasini olish uchun fuqaro belgilangan tartibda ariza bilan murojaat qiladi. 2023-yil 1-maydan bazaviy hisoblash miqdori (BHM) 300 ming so‘mdan 330 ming so‘mga oshirildi. Shuning uchun so‘nggi 3 oyda “prava” olish xarajatlari ham biroz oshgan. Xususan, davlat xizmatlari ko‘rsatilgani uchun BHM 10 foizi, yaʼni 33 000 so‘m miqdorida yig‘im undiriladi.

Haydovchilik guvohnomasi nazariy va amaliy imtihonlarni muvaffaqiyatli topshirgan talabgorlarga beriladi. Bunda quyidagi miqdorda to‘lovlar amalga oshiriladi:

• nazariy imtihon topshirish uchun — BHMning 10 foizi;
• har bir qayta nazariy imtihon topshirish uchun — BHMning 15 foizi (46 500 so‘m);
• avtomototransportlarni, shu jumladan, transport vositalari tarkibini amaliy boshqarishda imtihon topshirish uchun — BHMning 10 foizi;
• har bir qayta amaliy boshqarishda imtihon topshirish uchun — BHMning 15 foizi.

Ariza beruvchi nazariy imtihondan o‘tgan taqdirda, unga darhol avtomatik tarzda amaliy imtihonga ruxsat beriladi hamda 2 oylik muddat ichida amaliy imtihonni topshirishi lozimligi haqida ogohlantiriladi.

Agar nazariy imtihondan o‘ta olmasa, 7 kundan so‘ng imtihonni takroran topshirishi mumkin.

Amaliy imtihonlar sunʼiy ong orqali baholanadigan faqat maxsus tashkil etilgan avtodromda olinadi.

Ariza beruvchi nazariy va amaliy imtihonlarni muvaffaqiyatli topshirgach, unga milliy haydovchilik guvohnomasi beriladi. Mazkur guvohnomani berish uchun BHMning 70 foizi (231 000 so‘m) miqdorida yig‘im undiriladi.