Toshkent shahri Mirzo Ulug‘bek tumanida 32 yoshli ayol liftda qamalib, vafot etgani xabar qilingandi. “Daryo” muxbiri holat yuz bergan ko‘p qavatli uyga borib, reportaj tayyorladi.
Ijtimoiy tarmoqlarda tarqalgan xabarlarda odam o‘limi bilan yakunlangan ushbu ko‘ngilsizlikka elektr energiyasi ta’minotidagi doimiy uzilishlar sabab qilib ko‘rsatilgandi. Hududda xizmat olib borayotgan mas’ullarning aytishicha esa, marhuma liftga qamalib qolgan 23—24-iyul kunlari ko‘p qavatli uyda chiroq o‘chmagan.
“O‘rganishlar davomida ma’lum bo‘ldiki, aynan o‘sha kunlarda elektr energiyasida uzilishlar bo‘lmagan. Buni dispetcherlik xizmatining avariyaviy o‘chishlarni qayd etish jurnalida ham ko‘rish mumkin. Holatga sabab bo‘lgan narsa esa liftdagi nosozlik. Aholi ham buni tasdiqlab turibdi”, — deydi “Hududiy elektr tarmoqlari” AJ axborot xizmati rahbar Faxriddin Nuraliyev.
Uning aytishicha, xonadonlar yangi bo‘lgani bois liftlarga xizmat ko‘rsatuvchi shirkatlar hali tuzilmagan.
“Ayol bu turar joyda yashamagan, u Yashnobod tumanida istiqomat qilgan. Marhuma pochta ta’minotida faoliyat olib borgan, 24-iyul sanasida xizmat yuzasidan ushbu uyga kelgan”, — dedi Mirzo Ulug‘bek tumani hokimligi matbuot xizmati rahbari Ma’mur Parmonov.
Shu yerdagi aholi hamda mas’ullarning qo‘shimcha qilishicha, ayol xizmat yuzasidan lift orqali 8-qavatga ko‘tarilish chog‘ida nosozlik yuzaga kelgan. Marhuma taxminan 4 kun davomida lift ichida qamalib qolgan. 27-iyul kuni esa uning jasadi topilgan.
Izoh (0)