Joriy yilning yanvar—iyun oylari davomida O‘zbekistonga 2022-yilning mos davriga nisbatan 21,5 foizga kam pul o‘tkazmalari amalga oshirildi. Bu haqda Tashqi mehnat migratsiyasi agentligi xabar berdi.
Foto: “Daryo” / Madina Nurman
Joriy yilning dastlabki 6 oyi davomida O‘zbekistonga xorijdan 5,2 milliard dollar miqdorida pul o‘tkazilgan. O‘tgan 2022-yilning yanvar—iyun oylarida esa respublikaga kelib tushgan xalqaro transchegaraviy pul o‘tkazmalari hajmi 6,53 milliard dollarini tashkil etgandi. Oradagi pasayish hajmi — 21,5 foiz.
Mamlakatga 2022-yilda kelib tushgan transchegaraviy pul o‘tkazmalari hajmi 2021-yilning shu davriga nisbatan 96 foizga oshgandi (3,33 milliard dollar).
Avvalroq Rossiya rublining qadrsizlanayotgani O‘zbekistonga o‘tkazilayotgan pul hajmi kamayishiga olib kelgani xabar qilingandi. Markaziy bank raisi Mamarizo Nurmurodov Rossiya rubli joriy yil boshidan beri 26 foizga qadrsizlanganini aytgan.
“Rossiyadan O‘zbekistonga pul o‘tkazmalari umumiy xorijiy tushumlarning 80 foiziga yaqinni tashkil etadi. Rubl qadrsizlanishi tushumlarimiz pasayishiga olib keladi”, — degan u.
Avvalroq O‘zbekiston iqtisodiy o‘sish surʼatlari joriy yil birinchi yarim yilligida 5,6 foizni tashkil qilib, o‘tgan yilning mos davriga nisbatan yuqori surʼatlarni qayd etgani xabar qilingandi.
Izoh (0)