2023-yil yakuni bo‘yicha inflyatsiya darajasi 8,5—9,5 foiz atrofida bo‘lishi borasidagi prognozlar o‘zgarishsiz qoldi. Bu haqda Markaziy bank maʼlum qildi.
Joriy yil yakuni bo‘yicha inflyatsiya darajasi makroiqtisodiy rivojlanishning bazaviy ssenariysi doirasida shakllanib, bu boradagi prognozlar o‘zgarishsiz qoldirildi.
“Umumiy inflyatsiya yil boshidan pasayuvchi dinamikani namoyon etib, iyun oyida yillik 9 foizni tashkil qildi. Bunda, o‘tgan yilgi yuqori baza effekti taʼsirlari tugab borishi, import tovarlari va tartibga solinadigan narxlar nisbatan barqaror bo‘lgani asosiy pasaytiruvchi omillardan bo‘ldi. Xizmatlarga bo‘lgan yuqori talabning saqlanib qolishi hisobiga xizmatlar inflyatsiyasida sezilarli pasayish kuzatilmadi”, — deyiladi Markaziy bank xabarida.
Aholi va tadbirkorlarning inflyatsion kutilmalari ham pasayib, iyun oyida 13—13,5 foizni tashkil qilgan. Bunda inflyatsion kutilmalarning asosiy omillari qatorida valyuta kursi o‘zgarishi, ish haqi va nafaqalar oshishini kutayotgan respondentlar ulushi ortgan.
Iqtisodiy o‘sish surʼatlari joriy yil birinchi yarim yilligida 5,6 foizni tashkil qilib, o‘tgan yilning mos davriga nisbatan yuqori surʼatlarni qayd etgan. Kreditlash surʼatlarining tezlashishi, budjet xarajatlarining ortib borishi, xususan, ish haqi va nafaqalarning oshirilishi iqtisodiy faollikni qo‘llab-quvvatlovchi asosiy omillardan bo‘lmoqda.
“Yangilangan prognozlarga ko‘ra, tashqi iqtisodiy sharoitlarga iqtisodiyotning moslashuvini davom etayotgani va ayrim noaniqliklar saqlanib qolayotganini hisobga olib, 2023-yil yakunlari bo‘yicha real yalpi ichki mahsulot o‘sishi 5,0—6,0 foiz atrofida bo‘lishi kutilmoqda. Bunda, aholi daromadlari oshishi, fiskal rag‘batlar va xizmatlar sohasidagi faollikning yuqoriligi iqtisodiy o‘sishning asosiy qo‘llab-quvvatlovchi drayverlari bo‘ladi”, — deya maʼlum qilgan regulyator.
Kelgusi davrlarda bazaviy inflyatsiya prognozi va inflyatsion kutilmalarning ishonchli pasayish trayektoriyasiga o‘tishi asosiy stavkani pasaytirish imkoniyatlarini yanada oshiradi.
Avvalroq Markaziy bank boshqaruvi 2023-yil 27-iyuldagi yig‘ilishda asosiy stavkani yillik 14 foiz darajasida o‘zgarishsiz qoldirgani xabar qilingandi.
Izoh (0)