Oliy sudga da’vogar sifatida kelgan 66 yoshli erkak kutish zalida vafot etdi. Bu haqda “Daryo”ga Oliy sud axborot xizmati rahbari Aziz Abidov xabar berdi.
Ma’lum qilinishicha, 3-avgust kuni 1957-yilda tug‘ilgan fuqaro M.A. Oliy sudning Fuqarolik ishlari bo‘yicha sudlov hay’ati kassatsiya instansiyasida soat 9:15 ga tayinlangan sud majlisiga da’vogar sifatida kelgan.
Sud majlisi o‘z vaqtida boshlangan bo‘lib, sud majlisi kotibi taraflarni sud zaliga taklif etish uchun kutish xonasiga chiqqanida M.A. bexush holda yotganini ko‘rgan. Shu zahoti barcha zarur chora-tadbirlar amalga oshirilib, shoshilinch tez tibbiy yordam xodimlariga xabar berilgan. Hodisa joyiga zudlik bilan yetib kelgan tibbiyot xodimlari tomonidan M.A. hayotdan ko‘z yumgani aniqlangan.
Tibbiyot xodimlari bergan birlamchi xulosaga asosan fuqaro M.A.ning o‘limiga o‘tkir yurak yetishmovchiligi sabab bo‘lgan.
Izoh (0)