Жорий йилнинг январь—июнь ойлари давомида Ўзбекистонга 2022 йилнинг мос даврига нисбатан 21,5 фоизга кам пул ўтказмалари амалга оширилди. Бу ҳақда Ташқи меҳнат миграцияси агентлиги хабар берди.
Фото: “Дарё” / Мадина Нурман
Жорий йилнинг дастлабки 6 ойи давомида Ўзбекистонга хориждан 5,2 миллиард доллар миқдорида пул ўтказилган. Ўтган 2022 йилнинг январь—июнь ойларида эса республикага келиб тушган халқаро трансчегаравий пул ўтказмалари ҳажми 6,53 миллиард долларини ташкил этганди. Орадаги пасайиш ҳажми — 21,5 фоиз.
Мамлакатга 2022 йилда келиб тушган трансчегаравий пул ўтказмалари ҳажми 2021 йилнинг шу даврига нисбатан 96 фоизга ошганди (3,33 миллиард доллар).
Аввалроқ Россия рублининг қадрсизланаётгани Ўзбекистонга ўтказилаётган пул ҳажми камайишига олиб келгани хабар қилинганди. Марказий банк раиси Мамаризо Нурмуродов Россия рубли жорий йил бошидан бери 26 фоизга қадрсизланганини айтган.
“Россиядан Ўзбекистонга пул ўтказмалари умумий хорижий тушумларнинг 80 фоизига яқинни ташкил этади. Рубль қадрсизланиши тушумларимиз пасайишига олиб келади”, — деган у.
Аввалроқ Ўзбекистон иқтисодий ўсиш суръатлари жорий йил биринчи ярим йиллигида 5,6 фоизни ташкил қилиб, ўтган йилнинг мос даврига нисбатан юқори суръатларни қайд этгани хабар қилинганди.
Изоҳ (0)