Ўзбекистон дунё бўйича кенг полосали (симли) интернет тезлиги рейтингида 24 поғона кўтарилди. Бу ҳақда Cable.co.uk нашри хабар берди.
Маълум қилинишича, республика 2022 йилда дунёдаги симли интернет тезлиги бўйича рейтингда 155-ўринда бўлган. Жорий йилда эса натижалар ўзгариб, 131-ўринга кўтарилган. Яъни ўтган йилги рейтингга нисбатан 24 поғонага ўсиш бўлган. Платформада Ўзбекистондаги симли интернет тезлиги 21,67 Мбит/с экани қайд этилган.
Мазкур янгилик ҳақида фикр билдираркан, рақамли технологиялар вазири Шерзод Шерматов Ўзбекистонда интернет тезлигини ошириш бўйича ишлар кўплигига урғу берди.
“Жадвалга эътибор қаратсангиз, дунёдаги нотинчлик туфайли аксарият қўшни давлатларда интернет тезлиги рейтингида пасайиш кузатилган. Бироқ АКТ соҳасининг ривожига қаратилган чоралар натижасида Ўзбекистон 24 поғонага кўтарилган. Албатта, Ўзбекистонни IT хабга айлантириш йўлида интернет тезлигини ошириш бўйича ҳали жуда кўп иш қилишимиз керак”, —деб ёзган вазир Telegram каналида.
Рейтингга кўра, симли интернет тезлиги бўйича Ўзбекистон қўшни Қозоғистон ва Қирғизистонни ортда қолдирган. Хусусан, рўйхатда Қирғизистон 142- ўрин, Қозоғистон 155-ўрин, Туркманистон 206-ўрин, Тожикистон 214-ўриндан жой олган.
Рейтингда Жерси ороли (264,52 Мбит/с), Лихтенштейн(246,76 Мбит/с), Макао(231,40 Мбит/с), Исландия (229,35 Мбит/с) ва Гибралтар (206,27 Мбит/с) дунёдаги энг тез интернетга эга ҳудудлар сифатида юқори ўринлардан жой олган.
Дунё бўйича Афғонистон (1,71 Мбит/с), Яман (1,79 Мбит/с), Сурия (2,30 Мбит/с), Шарқий Тимор (2,50 Мбит/с) ва Экваториал Гвинея (2,70 Мбит/с) каби давлатлар интернет тезлиги энг паст бўлган давлатлар рўйхатига кирган.
Изоҳ (0)