Italiya Pekin bilan munosabatlariga putur yetkazmagan holda Xitoyning “Bir kamar — bir yo‘l” tashabbusidan chiqishi kerak, dedi Italiya mudofaa vaziri Guido Krozetto Corriere della Sera nashriga bergan intervyusida.
Xitoy yetakchisi Si Szinpin tomonidan 2013-yilda kiritilgan “Bir kamar — bir yo‘l” tashabbusi 2019-yilda ishga tushgan. U Xitoyni Markaziy Osiyo, Yevropa va Afrika mamlakatlari bilan bog‘laydigan yangi savdo yo‘llari, transport va iqtisodiy yo‘laklarni yaratishga qaratilgan.
Krozetto loyihaga qo‘shilishni Italiyaning sobiq bosh vaziri Juzeppe Konti hukumatining “o‘ylamasdan qilingan” qarori deb atadi, bu esa, vazirning so‘zlariga ko‘ra, salbiy oqibatga olib keldi. Rim bu tashabbusga 2019-yilda qo‘shilgan edi.
“Xitoy raqobatchi, lekin u hamkor ham. Biz undan (loyihadan) falokatlar yaratmasdan chiqib ketishimiz kerak. Bu hukumatning muammolaridan biri boshqa hukumatlar tomonidan yaratilgan syurrealistik muammolarni tinch hal qilishdir”, — dedi italiyalik vazir va Pekin jahon maydonida “borgan sari qat’iy pozitsiyani” egallayotganini ta’kidladi.
Bungacha Italiya bosh vaziri Jorja Meloni Xitoy loyihasiga qo‘shilishni “jiddiy xato” deb atagandi. Uning ta’kidlashicha, Italiya “Yettilik guruhi” (G7) davlatlaridan “Bir kamar — bir yo‘l”ga qo‘shilgan yagona davlat bo‘lishiga qaramay, Rim Pekinning savdodagi eng yirik sherigiga aylangani yo‘q.
“Bu Xitoy bilan Ipak yo‘lisiz ham yaxshi munosabatlar o‘rnatishimiz mumkinligini anglatadi, menimcha, bu haqda Xitoy hukumati va Italiya parlamentida muhokama o‘tkazish kerak. Dekabrgacha qaror qabul qilamiz”, — dedi u Fox News telekanaliga bergan intervyusida.
Muhokamalar bilan tanish bo‘lgan yuqori martabali amaldor Reuters agentligiga Italiya Xitoy bilan kelasi yil boshida tugaydigan “Bir kamar — bir yo‘l” kelishuvini yangilamasligi mumkinligini aytdi. Uning ta’kidlashicha, Rimga Pekin bilan bu masalani muhokama qilish uchun vaqt kerak.
G7 ga Italiyadan tashqari Buyuk Britaniya, Germaniya, Kanada, Fransiya, Yaponiya va AQSH kiradi. O‘tgan yili ular Global infratuzilma bo‘yicha hamkorlik loyihasini (PGII) boshladi. Reuters loyiha Xitoyning “Bir kamar — bir yo‘l” tashabbusi bilan raqobatlashishi kutilayotganini yozdi.
Izoh (0)