“Qarshi hujum Kiyev o‘ylagandek natija bermayapti” — Peskov

Rossiya prezidenti matbuot kotibi Dmitriy Peskov Kiyevning qarshi hujumi muvaffaqiyatsiz kechayotganini ta’kidladi.

Shuningdek, u NATOning ko‘p milliard dollarlik resurslari samarasiz va maqsadsiz sarflanayotgani, bu esa G‘arb mamlakatlari va soliq to‘lovchilari uchun noqulaylik tug‘dirayotganini qo‘shimcha qildi.

“Ochig‘i, qarshi hujum Kiyevda o‘ylangandek natija bermayapti. Bundan tashqari, NATO davlatlari Kiyev rejimiga o‘tkazgan ko‘p milliard dollarlik resurslar aslida samarasiz, maqsadsiz sarflanayotgani ham ko‘rinib turibdi”, — dedi Peskov jurnalistlar bilan suhbatda.

Ukraina mudofaa vaziri Aleksiy Reznikov CNN telekanaliga bergan intervyusida Ukrainaning qarshi hujumi grafikdan ortda qolayotganini, ammo bu uni bezovta qilmasligi, chunki hammasi reja bo‘yicha ketayotganini aytib o‘tgandi.

Vazir qarshi hujumlarning barchasi “tezkor bo‘lishi kerak” degan yanglish fikr borligini ta’kidlagan. Uning so‘zlariga ko‘ra, hujum sekin bormoqda, chunki “havo hujumidan mudofaa muammosi” bor, front oldi chizig‘i esa yuzlab kilometrga cho‘zilgan.

“Raqiblarimiz soni ko‘p. Shunday ekan bu kompyuter o‘yini emas, urush”, — degan vazir intervyuda.