Tallin politsiyasi 30-iyulga o‘tar kechasi Rossiya elchixonasi binosiga tuxum uloqtirgan qoidabuzarni hibsga oldi, deb yozmoqda Delfi.
Estoniya politsiyasi matbuot xizmati qo‘lga olingan shaxs 1977-yilda tug‘ilgan erkak ekanini ma’lum qildi. Unga nisbatan ish qo‘zg‘atilgan. Huquq-tartibot idoralari boshqa tafsilotlarni oshkor qilmagan.
Shu bilan birga, “Tinch qarshilik ko‘rsatish” tashkiloti faoli Mixail Baranov Tallinda hibsga olingan odam jurnalist Arkadiy Babchenko ekanini aytdi.
Babchenkoning o‘zi ijtimoiy tarmoqlarda politsiya mashinasidan tushgan suratini joyladi. Facebook’dagi izohlarida u haqiqatan ham Rossiya elchixonasiga tuxum uloqtirganini tasdiqladi.
“Moskovskiy komsomolets” va “Novaya gazeta” gazetalarida harbiy muxbir bo‘lib ishlagan Arkadiy Babchenko 2017-yildan beri Rossiyadan tashqarida yashaydi va Rossiya hukumatini keskin tanqid qilib keladi. 2018-yilning iyun oyida jurnalist Ukrainada yashayotganida uning o‘ldirilgani haqida xabar tarqaldi. Bir kun o‘tgach, qotillik sahnalashtirilgan ekani va Babchenkoning tirikligi ma’lum bo‘ldi. Ukraina xavfsizlik xizmati Rossiya maxsus xizmatlari Babchenkoga suiqasd uyushtirishga tayyorgarlik ko‘rayotgani, tomosha esa ularning rejalarini oshkor qilish uchun zarur bo‘lganini ta’kidladi.
2020-yildan beri Babchenko “Rosfinmonitoring” terrorchilari va ekstremistlari ro‘yxatiga kiritilgan. 2023-yil yanvar oyida Rossiya Ichki ishlar vazirligi uni qidiruvga berdi, aprel oyida Rossiya Adliya vazirligi jurnalistni “xorijiy agentlar” reyestriga kiritdi.
Izoh (0)