Италия Пекин билан муносабатларига путур етказмаган ҳолда Хитойнинг “Бир камар — бир йўл” ташаббусидан чиқиши керак, деди Италия мудофаа вазири Гуидо Крозетто Cоrriere della Sera нашрига берган интервьюсида.
Хитой етакчиси Си Цзиньпин томонидан 2013 йилда киритилган “Бир камар — бир йўл” ташаббуси 2019 йилда ишга тушган. У Хитойни Марказий Осиё, Европа ва Африка мамлакатлари билан боғлайдиган янги савдо йўллари, транспорт ва иқтисодий йўлакларни яратишга қаратилган.
Крозетто лойиҳага қўшилишни Италиянинг собиқ бош вазири Жузеппе Конти ҳукуматининг “ўйламасдан қилинган” қарори деб атади, бу эса, вазирнинг сўзларига кўра, салбий оқибатга олиб келди. Рим бу ташаббусга 2019 йилда қўшилган эди.
“Хитой рақобатчи, лекин у ҳамкор ҳам. Биз ундан (лойиҳадан) фалокатлар яратмасдан чиқиб кетишимиз керак. Бу ҳукуматнинг муаммоларидан бири бошқа ҳукуматлар томонидан яратилган сюрреалистик муаммоларни тинч ҳал қилишдир”, — деди италиялик вазир ва Пекин жаҳон майдонида “борган сари қатъий позицияни” эгаллаётганини таъкидлади.
Бунгача Италия бош вазири Жоржа Мелони Хитой лойиҳасига қўшилишни “жиддий хато” деб атаганди. Унинг таъкидлашича, Италия “Еттилик гуруҳи” (G7) давлатларидан “Бир камар — бир йўл”га қўшилган ягона давлат бўлишига қарамай, Рим Пекиннинг савдодаги энг йирик шеригига айлангани йўқ.
“Бу Хитой билан Ипак йўлисиз ҳам яхши муносабатлар ўрнатишимиз мумкинлигини англатади, менимча, бу ҳақда Хитой ҳукумати ва Италия парламентида муҳокама ўтказиш керак. Декабргача қарор қабул қиламиз”, — деди у Fox News телеканалига берган интервьюсида.
Муҳокамалар билан таниш бўлган юқори мартабали амалдор Reuters агентлигига Италия Хитой билан келаси йил бошида тугайдиган “Бир камар — бир йўл” келишувини янгиламаслиги мумкинлигини айтди. Унинг таъкидлашича, Римга Пекин билан бу масалани муҳокама қилиш учун вақт керак.
G7 га Италиядан ташқари Буюк Британия, Германия, Канада, Франция, Япония ва АҚШ киради. Ўтган йили улар Глобал инфратузилма бўйича ҳамкорлик лойиҳасини (PGII) бошлади. Reuters лойиҳа Хитойнинг “Бир камар — бир йўл” ташаббуси билан рақобатлашиши кутилаётганини ёзди.
Изоҳ (0)