O‘zbekistonlik MMA jangchisi Nursulton Ro‘ziboyev (36-8-2) UFC promoushenidagi navbatdagi jangini 4-noyabr kuni UFC Fight Night 230 musobaqasida o‘tkazadi.
Ro‘ziboyevga Braziliya vakili Kayo Borralyo (14-1) raqib bo‘ladi. Bu haqida Ro‘ziboyevning o‘zi Instagram sahifasida ma’lum qildi.
Qayd etish kerak, Borralyo 2022-yilning 22-oktabr kuni o‘tkazilgan UFC turnirida o‘zbekistonlik yakkakurashchi Mahmud Murodov ustidan g‘alaba qozongandi.
UFC Fight Night 230 musobaqasi Braziliyaning San-Paulu shahrida o‘tkaziladi. Mazkur turnirning asosiy jangi Kyortis Bleyds va Jailton Almeyda ishtirokida o‘tishi kutilmoqda. Turnir O‘zbekiston vaqti bilan 4-noyabrdan 5-noyabrga o‘tar kechasi bo‘lib o‘tadi.
Nursulton 2-iyul kuni UFC’dagi debyutini o‘tkazdi. U braziliyalik yengilmas jangchi Bruno Ferreyrani (10-1) birinchi raunddayoq nokaut bilan mag‘lub etdi.
Borralyo oxirgi marta 2023-yilning 29-aprel kuni Mixal Olekseychukga qarshi jang qilib, uni 2-raundda sabmishen bilan yenggandi. Bu Kayo uchun UFC promoushenidagi 5-jang bo‘ladi. Braziliya vakili promoushenda g‘alabali seriya qayd etmoqda.
Izoh (0)