Vyetnamda Kajiki to‘foni 3 kishini hayotdan olib ketdi, yana 10 kishi jarohatlandi. Bu haqda rasmiylar 26-avgust kuni ma’lum qildi.
Mamlakat hukumati kuchli yomg‘ir suv toshqinlari va ko‘chkilarga sabab bo‘lishidan ogohlantirmoqda. Xabar qilinishicha, to‘fon 7 mingga yaqin uyga zarar yetkazgan, 18 ming daraxtni qo‘porib tashlagan va 28,8 ming gektar sholi maydonini suv bosgan. Shuningdek, 331 ta elektr ustuni qulashi oqibatida Thanh Hoa, Nghe An, Ha Tinh, Thai Nguyen va Phu Tho provinsiyalari elektr ta’minotidan uzilib qolgan.
Ob-havo agentligiga ko‘ra, Kajiki 25-avgust kuni tushdan keyin Vyetnamning shimoliy markaziy qirg‘og‘iga yopirilgan. Shundan so‘ng, to‘fon ertasi kuni ertalab Laosga qarab harakatlanayotganda biroz zaiflashgan.
Mamlakat shimolidagi bir qancha hududlarda yomg‘ir yog‘ishi yana davom etadi, ba’zi joylarda 6 soat ichida 150 millimetrgacha yog‘in bo‘lishi mumkin. Bu esa sel va ko‘chkilarga olib kelishi prognoz qilinmoqda. Bundan oldinroq Vyetnam hukumati to‘fon sababli 586 mingdan ortiq aholining xavfsiz hududlarga evakuatsiya qilinishini ma’lum qilgandi.
Kajiki 24-avgust kuni Vyetnamga yopirilishidan oldin Xitoyning Xaynan orolining janubiy qirg‘oqlarini aylanib o‘tgan. Oroldagi Sanya shahrida korxonalar va jamoat transportining faoliyati to‘xtatilgan. Tabiiy ofat hududda 102 ming insonning hayotiga salbiy ta’sir etmoqda.
Izoh (0)