AQSHning Las-Vegas shahrida O‘zbekiston vaqti bilan 2-iyul tongida UFC musobaqasi o‘tkazildi.
UFC Vegas 76 musobaqasining asosiy kardida o‘zbekistonlik yakkakurashchi Nursulton Ro‘ziboyev (36-8-2) jang qildi. Unga Braziliya vakili Bruno Ferreyra (10-1) raqib bo‘ldi.
Nursulton jangning birinchi raundidayoq raqibini kuchli zarba bilan nokautga uchratdi va muddatidan avval g‘alabani qo‘lga kiritdi.
Shu tariqa Ro‘ziboyev UFC promoushenidagi debyutini muvaffaqiyatli boshladi.
O‘zbekistonlik sportchi faoliyatidagi 36-g‘alabani qo‘lga kiritdi. Ferreyra esa MMA’dagi ilk mag‘lubiyatini qabul qilib oldi.
Ro‘ziboyev UFC bilan 21-iyun kuni shartnoma imzoladi va qisqa muddat ichida jang qilishiga to‘g‘ri keldi. Ushbu MMA oqshomida Ferreyraga Abdulrazzoq Alhassan (12-5) raqib bo‘lishi rejalashtirilgandi, biroq yakkakurashchi jarohat sabab safdan chiqdi va uning o‘rnini Nursulton egalladi.
Izoh (0)