O‘zbekistonda yarim yilda 68 ta yangi maktab qurilgani ma’lum qilindi. Milliy statistika qo‘mitasi ma’lumotlariga ko‘ra, 2025-yilning yanvar-iyun oylarida respublikada ishga tushirilgan maktablar soni 68 tani tashkil etdi.
Ularning 34 tasi qishloq joylarga to‘g‘ri keladi. Hududlar bo‘yicha yangi maktablar soni quyidagicha:
- Andijon viloyati – 35 ta;
- Buxoro viloyati – 19 ta;
- Xorazm viloyati – 7 ta;
- Namangan viloyati – 6 ta;
- Qoraqalpog‘iston Resp. – 1 ta.
Mamlakatda 2023/2024-o‘quv yili boshiga faoliyat yuritayotgan umumta’lim muassasalari (maktab) soni 10 750 tani tashkil etgan. Joriy yilda yangi maktablar qurish uchun Islom taraqqiyot bankidan 200 million dollar jalb qilindi. Buning evaziga yangi maktablar qurilib, 72 mingta o‘quvchi o‘rni yaratiladi.
O‘zbekistonda 2025/2026-o‘quv yilida 738 ming nafar bola 1-sinfga kelishi kutilmoqda. 1-sinfga qabul qilinayotgan bolalar uchun 12 nomdagi o‘quv qurollari Prezident sovg‘asi sifatida tayyorlandi. Unda 1 ta o‘quv sumkasi, 12 ta o‘n ikki varaqli daftar, 1 ta ruchka, 2 ta oddiy qalam, 1 ta o‘n ikki rangdagi qalamlar to‘plami, 1 ta rangli qog‘oz to‘plami, 1 ta plastilin, 1 ta rasm daftari, 2 ta o‘chirg‘ich, 1 ta o‘n ikki rangdagi akvarel buyog‘i, 1 ta yelim (kley), 1 ta qalamdon bor.
Yangi o‘quv yilida O‘zbekistonda mavjud 10 170 tadan ortiq umumtaʼlim maktablarida 6,7 million nafar o‘quvchi taʼlim olishni boshlashi kutilmoqda. Shuningdek, yangi o‘quv yilida respublikada 30 dan ortiq yangi maktablar o‘z faoliyatini boshlaydi.
Joriy yilda ijtimoiy, ishlab chiqarish dasturlari va boshqa manbalar hisobidan 379 ta maktabda qurilish va taʼmirlash ishlari olib borilmoqda va buning natijasida 112 minga yaqin o‘quvchi o‘rni yaratilishi, 73 mingtadan ortiq o‘rinli o‘quv binolari mukammal taʼmirlanishi rejalashtirilgan.
Izoh (0)