Madridning “Real” klubi yarim himoyachisi Dani Sebalyos faoliyatini Fransiya chempionatida davom ettirishi mumkin. Bu haqda insayder Fabrisio Romano o‘zining X (sobiq Twitter) tarmog‘idagi sahifasida xabar berdi.
Unga ko‘ra, “Marsel” Sebalyosni o‘z safiga qo‘shib olish uchun jiddiy harakat boshlagan. Klub rahbariyati jamoaning yarim himoya chizig‘ini kuchaytirishni rejalashtirgan va ispaniyalik futbolchi ushbu pozitsiya uchun asosiy nomzodlaridan biri hisoblanadi.
“Real” va “Marsel” o‘rtasida dastlabki muzokaralar o‘tkazilgani aytilmoqda. Romanoning qo‘shimcha qilishicha, kelishuv oson bo‘lmasligi mumkin, biroq “Marsel” Sebalyosni 2026-yil yozida sotib olish sharti bilan ijaraga olish niyatida.
Sebalyos 24-avgust, yakshanba kuni o‘tkazilgan “Ovyedo”ga qarshi o‘yindan so‘ng o‘zining Instagram sahifasida “Real”ni tark etishi haqida post joylagan, ammo keyinchalik uni o‘chirib tashlagan. Futbolchi klubni tark etishni istamoqda, chunki u Xabi Alonso boshchiligidagi jamoaning asosiy o‘yinchilaridan biri emas. Shu sababli Sebalyos klubdan ketishga qaror qilgan.
Avvalroq Sebalyosga Ispaniya La Ligasining boshqa bir jamoasi — “Betis” ham qiziqish bildirgan edi. Ammo Andalusiya klubi futbolchi uchun belgilangan summani to‘lay olmadi va transferdan voz kechgan.
- Dani Sebalyos 2017-yildan beri “Real” sharafini himoya qilib keladi.
- Uning klub bilan shartnomasi 2027-yilning yoziga qadar amal qiladi.
- Transfermarkt portali yarim himoyachining qiymatini 10 million yevroga baholagan.
Izoh (0)