Futbol bo‘yicha O‘zbekiston Superligasining 14-turida “Paxtakor” va “Olimpik” jamoalari o‘zaro to‘qnash keldi. Uchrashuvda 2:0 hisobida “sherlar”ning qo’li baland keldi. O‘yindan keyingi matbuot anjumanida ikkala jamoa murabbiylari o‘z fikrlarini bayon etdi.
Bugun jismonan charchab qolmaslik kerak edi. Jamoaning jismoniy holatidan ko‘nglim to‘q. Shunchaki, taktik jihatdan ham yaxshiroq o‘ynashimizni istagandik. Buni uddaladik. Raqibdan ancha keskinroq o‘ynadik va haqqoniy g‘alabaga erishdik.
Hamraliyev bilan gaplashib oldik. U juda yaxshi futbolchi. Aqlli va kelajagi bor o‘yinchi. Bu yoshda bunday xatolar qilishi tabiiy. Xayolidagi negativ narsalarni chiqarib tashlashini maslahat berdim.
Transfer oynasida o‘zimiz istagan futbolchilarni oldik deya olaman. Endi oladigan bo‘lsak, faqat mahalliy futbolchilardan olamiz. Legionerlar uchun limitimiz tugadi.
Abbos Fayzullayevning jamoadan ketishi kutilmagan jarayon emas. Buni kutgandik. U bilan bungacha gaplashdik. Ammo, ketishi bu uning tanlovi. Unga faqat omad tilayman.
Jamoaning barcha chizig‘ida raqobat bor deya olaman. Yangi olib kelgan darvozabonimizning harakatlari meni ancha quvontirayapti. Bu Quvvatovga ham yetarli motivatsiya. Umuman olganda, boshqa chiziqlarda ham raqobat yetarli.
Maksim Shatskix, “Paxtakor” bosh murabbiyi
“Olimpik” ustozi Timur Kapadze ham uchrashuv borasida o‘z fikrlarini bildirib o‘tdi.
Qiziqarli bahs bo‘ldi. Bugun yigitlar futbol o‘ynashga harakat qildi. Afsuski, “Paxtakor” futbolchilari tezkor goldan so‘ng vaqt cho‘zishga harakat qilishdi. “Sherlar” bunday tarkibi bilan yaxshisi, futbol o‘ynasa bo‘lardi. To‘xtalishlar juda ham ko‘p bo‘ldi. Biz bugun futbol o‘ynamoqchi edik. Mehmonlar esa shunday usul bilan tempni buzishga harakat qildi. O‘zimizning xatolar sabab ikkita to‘p olib chiqdik. Ikkala vaziyatda ham hujumni bartaraf etishning imkoni bor edi.
“Paxtakor” Xoldorxonovni bizga berishni istamayapti. O‘ylashimcha, klub uni qo‘yib yuborganida yaxshi bo‘lar edi. Boisi, “sherlar”ning hujum chizig‘ida futbolchilar yetarlicha va qancha o‘yin amaliyotiga ega bo‘lishini vaqt ko‘rsatadi. Uning nimalarga qodir ekanligini bilamiz. Shu sabab u bizning jamoada harakat qilganida ko‘proq o‘ynagan bo‘lar edi. Futbolchini terma jamoaga tayyorlashda o‘yin amaliyoti muhim sanaladi.
Men uchun futbolchilarning o‘yin amaliyotiga ega bo‘lishi muhim. Ular termaga tonusda kelishlari lozim. Masalan, hozir Norchayevdan xavotirdaman. U juda ham kam maydonga tushmoqda. Termaga chaqirilganda formada emasligiga guvoh bo‘ldim.
Jo‘raqo‘ziyev kelgusi uchrashuvda ham maydonga tushmasligi mumkin. Ikki-uch kundan so‘ng mashg‘ulotlarni boshlaydi. Uning ham yo‘qligi katta yo‘qotish.
Timur Kapadze, “Olimpik” bosh murabbiyi
Izoh (0)