Jinoyat ishlari bo‘yicha Andijon shahar sudida Suriyadagi jangarilar safiga qo‘shilmoqchi bo‘lgan shaxsga nisbatan hukm o‘qildi.
Qayd etilishicha, Andijon viloyatida yashovchi 30 yoshli I.U. 2021—2022-yillarda Turkiyaning Istanbul shahrida ishlagan davrida Suriyadagi terroristik tashkilot yo‘lovchilarining taʼsiriga tushib, ularning safiga borib qo‘shilishni reja qilgan.
Shu maqsadda I.U. bir necha bor Suriyaga o‘tishga uringan, lekin turk chegarachilari bunga imkon bermagan. Ammo navbatdagi urinish vaqtida u harbiylar tomonidan qo‘lga olinib, O‘zbekistonga deportatsiya qilingan.
Mazkur shaxs doimiy yashash manziliga qaytib kelganidan keyin ham ijtimoiy tarmoqlar orqali terroristik tashkilot aʼzolari bilan aloqada bo‘lgan. Davlat xavfsizlik xizmatining Andijon viloyati bo‘yicha boshqarmasi tomonidan amalga oshirilgan tezkor-qidiruv tadbirlari natijasida I.U.ning noqonuniy harakatlariga chek qo‘yilgan va unga nisbatan jinoyat ishi qo‘zg‘atilib, tergov harakatlari olib borilgan.
Jinoyat ishlari bo‘yicha Andijon shahar sudining hukmiga ko‘ra, I.U. Jinoyat kodeksining 155-2 (terrorchilik faoliyatini amalga oshirish maqsadida o‘quvdan o‘tish, chiqish yoki harakatlanish) va 244-2-moddalari (diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) bilan aybdor deb topilib, 8 yil 1 oy muddatga ozodlikdan mahrum etildi.
Bundan oldin internet orqali aqidaparastlik g‘oyalari bilan yo‘g‘rilgan materiallar tarqatgan qashqadaryolik yigit 6 yilga ozodlikdan mahrum etilgani, Buxoro viloyatida diniy ekstremistik oqim targ‘iboti bilan shug‘ullanib kelgan shaxsga nisbatan jinoyat ishi qo‘zg‘atilgani to‘g‘risida xabar berilgandi.
Izoh (0)