Жиноят ишлари бўйича Андижон шаҳар судида Суриядаги жангарилар сафига қўшилмоқчи бўлган шахсга нисбатан ҳукм ўқилди.
Қайд этилишича, Андижон вилоятида яшовчи 30 ёшли И.У. 2021—2022 йилларда Туркиянинг Истанбул шаҳрида ишлаган даврида Суриядаги террористик ташкилот йўловчиларининг таъсирига тушиб, уларнинг сафига бориб қўшилишни режа қилган.
Шу мақсадда И.У. бир неча бор Сурияга ўтишга уринган, лекин турк чегарачилари бунга имкон бермаган. Аммо навбатдаги уриниш вақтида у ҳарбийлар томонидан қўлга олиниб, Ўзбекистонга депортация қилинган.
Мазкур шахс доимий яшаш манзилига қайтиб келганидан кейин ҳам ижтимоий тармоқлар орқали террористик ташкилот аъзолари билан алоқада бўлган. Давлат хавфсизлик хизматининг Андижон вилояти бўйича бошқармаси томонидан амалга оширилган тезкор-қидирув тадбирлари натижасида И.У.нинг ноқонуний ҳаракатларига чек қўйилган ва унга нисбатан жиноят иши қўзғатилиб, тергов ҳаракатлари олиб борилган.
Жиноят ишлари бўйича Андижон шаҳар судининг ҳукмига кўра, И.У. Жиноят кодексининг 155-2 (террорчилик фаолиятини амалга ошириш мақсадида ўқувдан ўтиш, чиқиш ёки ҳаракатланиш) ва 244-2-моддалари (диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) билан айбдор деб топилиб, 8 йил 1 ой муддатга озодликдан маҳрум этилди.
Бундан олдин интернет орқали ақидапарастлик ғоялари билан йўғрилган материаллар тарқатган қашқадарёлик йигит 6 йилга озодликдан маҳрум этилгани, Бухоро вилоятида диний экстремистик оқим тарғиботи билан шуғулланиб келган шахсга нисбатан жиноят иши қўзғатилгани тўғрисида хабар берилганди.
Изоҳ (0)