Buxoroda ekstremistik oqim g‘oyalari targ‘ibotchisiga jinoyat ishi qo‘zg‘atildi

Buxoro viloyatida diniy ekstremistik oqim targ‘iboti bilan shug‘ullanib kelgan shaxsga nisbatan jinoyat ishi qo‘zg‘atildi, deb xabar beradi O‘zA.

Ma’lum qilinishicha, G‘ijduvon tumanida yashovchi 34 yoshli B.J. 2015—2021-yillarda Moskva shahridagi oliy taʼlim muassasasida o‘qishi davrida ijtimoiy tarmoqlar orqali “Salafiylar” DEO taʼsiriga tushib, Telegram messenjerida ikkita guruh ochgan va ushbu diniy ekstremistik oqim g‘oyalarini targ‘ib qilish bilan shug‘ullangan.

Shuningdek, O‘zbekistonga qaytib kelganidan keyin ham u o‘zining noqonuniy harakatlarini davom ettirib, ekstremistik g‘oyalarni yaqin qarindoshlariga targ‘ib qilgan.

Davlat xavfsizlik xizmati xodimlari tomonidan olib borilgan tezkor-qidiruv tadbirlari natijasida ushbu shaxsning noqonuniy faoliyatiga chek qo‘yilgan.

Din ishlari bo‘yicha qo‘mita xulosasiga ko‘ra, uning mobil telefon apparati xotirasida aqidaparastlik g‘oyalari bilan yo‘g‘rilgan materiallar mavjud bo‘lib, ular O‘zbekiston hududiga olib kirish, tayyorlash va tarqatish taqiqlangan materiallar sirasiga kiradi.

Hozirda B.J.ga nisbatan Jinoyat kodeksining 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “g” bandi bilan jinoyat ishi qo‘zg‘atilib, tergov harakatlari olib borilmoqda.

Bir necha kun oldin Toshkent davlat iqtisodiyot universiteti talabasi, 21 yoshli Jahongir Ulug‘murodov Telegram guruhda diniy mazmundagi nashida tarqatgani uchun 3 yilga ozodlikdan mahrum qilish jazosi tayinlangani haqida xabar berilgan edi. Mazkur holat keng jamoatchilik tomonidan e’tirozlarga sabab bo‘ldi.

Xususan, faollar talabaning yoshligi, do‘stlariga yuborgan nashidaning maʼnosini tushunmay shu ishni qilgani va berilgan jazo o‘ta og‘irligini qayd etgan. Toshkent viloyati IIBB axborot xizmati ijtimoiy tarmoqlarda ayrim elektron ommaviy axborot vositalari va virtual makon foydalanuvchilari orasida “tanishlariga oddiy diniy qo‘shiq — nashida tarqatgan talaba qamaldi” mazmunidagi noxolis maʼlumotlar tarqalayotgani yuzasidan munosabat bildirgandi.