O‘zbekistonda 2023-yilning yanvar—iyun oylarida yirik korxonalar tomonidan 332,6 ming tonna shakar ishlab chiqarildi. Bu haqda Statistika agentligi xabar berdi.
Qayd etilishicha, mamlakatda shakar ishlab chiqarish hajmi 2022-yilning mos davri bilan solishtirilganda 7,9 foizga oshgan.
O‘zbekistonda 2023-yilning iyun oyida yirik korxonalar tomonidan 67,4 ming tonna shakar ishlab chiqarilgan.
Raqobatni rivojlantirish va iste’molchilar huquqlarini himoya qilish qo‘mitasi iyul boshida O‘zbekiston ichki bozorlarida shakarning chakana narxi yil boshiga nisbatan 10 foizga pasayganini ma’lum qilgandi. Respublikada yillik umumiy ishlab chiqarish quvvati 900 ming tonnadan ortiq bo‘lgan mahalliy shakar ishlab chiqaruvchi (“Xorazm shakar” MChJ va “Angren shakar” MChJ) korxonalarning ichki ehtiyojini (o‘rtacha 650 ming tonna) 138 foizdan ortig‘ini qoplash imkoniyati mavjud.
O‘zbekistonda shakar mahsuloti zaxirasi
Ichki bozorni shakar mahsuloti bilan uzluksiz taʼminlash maqsadida mahalliy shakar ishlab chiqaruvchilar tomonidan ishlab chiqarish quvvatlarini modernizatsiya qilish ishlari olib borilmoqda va birinchi bosqichida (1-mayga qadar) shakar ishlab chiqarish quvvatlarini o‘tgan yilga nisbatan 25 foizga oshirilishi, natijada sutkasiga 2,5 ming tonnagacha shakar ishlab chiqarilishi rejalashtirilgan edi. Bunda, yillik shakar ishlab chiqarish 600 ming tonnadan 1 million tonnagacha oshishi kutilmoqda.
Raqobatni rivojlantirish va iste’molchilar huquqlarini himoya qilish qo‘mitasiga ko‘ra, respublika aholisini yetarli miqdorda va maqbul narxlarda shakar va un mahsulotlari bilan taʼminlash bo‘yicha hukumat tomonidan zarur choralar ko‘rilgan.
Izoh (0)