O‘zbekiston delegatsiyasining Vengriyaga tashrifi doirasida investitsiyalar, sanoat va savdo vaziri Laziz Qudratov Iqtisodiy hamkorlik bo‘yicha O‘zbekiston—Vengriya hukumatlararo komissiyasining 8-yig‘ilishida va uning doirasida tashkil etilgan qo‘shma biznes forumida ishtirok etgani barobarida qator ikki tomonlama uchrashuv va muzokaralar o‘tkazdi. Bu haqda “Dunyo” agentligi xabar berdi.
Qayd etilishicha, yig‘ilish doirasida ikki mamlakatning 200 dan ortiq ishbilarmon va rasmiy doiralari vakillari ishtirokida biznes forumi ham bo‘lib o‘tgan. O‘zbekiston tomoni investorlarning qulay faoliyat yuritishi uchun mamlakatda joriy etilgan shart-sharoitlarga doir maʼlumotlarni taqdim etgani barobarida yangi qo‘shma loyiha va tashabbuslarni har tomonlama qo‘llab-quvvatlashga tayyor ekanini bildirgan.
Vengriya tashqi ishlar vaziri Petr Siyyarto bilan bo‘lib o‘tgan muzokaralar chog‘ida suhbatdosh O‘zbekiston bilan do‘stlik va samarali ikki tomonlama hamkorlikni mustahkamlash borasida ikki davlat rahbarlarining qatʼiy siyosiy irodasi tufayli ko‘p qirrali munosabatlar tez surʼatlarda rivojlanib borayotganini yuqori baholagan.
Ikki mamlakat o‘rtasidagi munosabatlarni faollashtirish maqsadida Toshkent va Budapesht shaharlari o‘rtasida to‘g‘ridan to‘g‘ri aviaqatnovlarni yo‘lga qo‘yish, shuningdek, o‘zaro sayyohlik oqimining o‘sishiga ijobiy taʼsir ko‘rsatishi kutilayotgan viza tartib-taomillarini soddalashtirishga kelishib olingan.
Bundan tashqari, KESH, Gedeon Rixter, Meditop, Wizz Air, Bonafarm, Mall Group va Semmelweis University singari Vengriyaning yetakchi kompaniya va muassasalari rahbarlari bilan uchrashuvlar o‘tkazilgan. Ular davomida ham qator aniq kelishuvlarga erishilgan.
2022-yil oktabrda Shavkat Mirziyoyev va Vengriya Viktor Orban O‘zbekiston hamda Vengriya o‘rtasidagi strategik sheriklikni rivojlantirish to‘g‘risida qo‘shma bayonot imzolagandi. 2023-yil mart oxirlarida esa Budapesht shahrida O‘zbekiston elchixonasi ochildi.
Izoh (0)