Farg‘ona shahrida joylashgan karaoke kafesida yuz bergan yong‘in oqibatida 6 nafar fuqaro halok bo‘lgani to‘g‘risida xabar berilgandi. Bosh vazir Abdulla Aripov halok bo‘lgan va jabrlanganlarga yordam ko‘rsatish bo‘yicha tegishli farmoyishni imzoladi.
29-iyul kuni soat 11:40 larda Farg‘ona shahri “Mash’al” MFY 24-uy manzilida joylashgan (“Olimpik” xususiy korxonasiga tegishli) to‘rt qavatli binoning yerto‘lasida joylashgan karaokeda taxminan 40 kvadrat metr maydonda ichki jihozlar yongan.
Sodir bo‘lgan yong‘in oqibatida 6 nafar fuqaro voqea joyida vafot etgan, shuningdek, 7 nafar fuqaro shifoxonaga joylashtirilgan.
Prezident topshirig‘iga ko‘ra hukumat komissiyasi tuzilgan. Qayd etilishicha, jabrlanganlarga SSV Respublika shoshilinch tibbiy yordam ilmiy markazi Farg‘ona viloyati filialida zarur tibbiy yordam ko‘rsatilmoqda. Holat yuzasidan Farg‘ona viloyati prokuraturasi tomonidan jinoyat ishi qo‘zg‘atilgan va tergov harakatlari olib borilmoqda.
Komissiya o‘z faoliyatini yong‘in va texnika xavfsizligi, shuningdek, baxtsiz hodisalarni tekshirish va hisobga olish to‘g‘risidagi qonunchilik hujatlari talablariga muvofiq tashkil etadi.
Komissiya bir hafta muddatda:
- Baxtsiz hodisa oqibatida vafot etganlarning oila a’zolariga hamda jabrlanganlarga tibbiy, moddiy, psixologik va boshqa yordamlar ko‘rsatilishini ta’minlaydi.
- Shuningdek, komissiya obyektda baxtsiz hodisa kelib chiqishiga olib kelishi mumkin bo‘lgan omillarni har tomonlama o‘rganib chiqadi.
- Tekshirish yakunlari bo‘yicha tegishli dalolatnomalar rasmiylashtirilib, jabrlanganlarga ko‘rsatilgan yordamlar bo‘yicha hisobot Vazirlar Mahkamasiga kiritiladi.
Izoh (0)