Rossiya Shimoliy Koreyadan qurol-yarog‘ sotib olmoqda — AQSH razvedkasi

Rossiya Shimoliy Koreyadan millionlab artilleriya snaryadlari hamda kichik va o‘rta masofali raketalarni sotib olmoqda, deya xabar berdi The New York Times AQSH razvedkasi oshkor qilgan ma’lumotlarga tayanib. Shunga o‘xshash axborotni amerikalik mansabdor CNN’ga ham ma’lum qilgan.

AQSH hukumati vakillari yetkazmalar tafsilotlarini oshkor etmadi, xususan, Pxenyan Moskvaga aynan qanday qurol-yarog‘larni qanday hajmda va qancha muddatda taqdim etayotganiga aniqlik kiritmadi. Biroq, anonim amerikalik mansabdor so‘zlariga ko‘ra, Rossiya kelajakda Shimoliy Koreyadan harbiy texnika sotib olishi mumkinligi ham kutilmoqda.

Hozircha jurnalistlar bu haqdagi ma’lumotni mustaqil manbalari orqali tekshirib ko‘rish imkoniyatiga ega emas, deb yozadi The New York Times.

Shimoliy Koreya texnikasini xarid qilganlik to‘g‘risidagi razvedka ma’lumotlari Rossiya Eronning zarbdor uchuvchisiz uchar qurilmalarini sotib olgani ma’lum bo‘lganidan keyin bir hafta o‘tib oshkor etildi. Shu bilan birga, The Washington Post manbalari ma’lumotlariga ko‘ra, dastlabki sinovlar chog‘ida Eron uchuvchisiz qurilmalari bir necha marta ishdan chiqqan, bundan “rossiyaliklar norozi bo‘lgan”.

The New York Times’ning amerikalik mansabdorlar orasidagi manbalari qayd etishicha, Rossiyaning Eronga va Shimoliy Koreyaga murojaat qilish qarori shundan darak beradiki, G‘arb sanksiyalari uning Ukrainada jang qilayotgan Rossiya armiyasi uchun qurol-yarog‘ g‘amlab qo‘yish imkoniyatlariga ta’sir qilmoqda.

Shuningdek, Moskva Pekin sanksiyalarni buzib, Rossiya armiyasini ta’minlashiga umid qilgan edi, deb yozadi gazeta. Ammo amerikalik mansabdorlarga ko‘ra, shu paytgacha Xitoy eksport cheklovlariga rioya qilib kelgan va Rossiyaga harbiy texnika yoki uni yaratish uchun tarkibiy qismlarni sotishga urinmagan. Avvalroq Vashington Pekinni Moskvaga yordam berish qanday oqibatlarga olib kelishi mumkinligi haqida ogohlantirgandi.

Amerika tadbirkorlik instituti harbiy eksperti Frederik Kaganning so‘zlariga ko‘ra, Shimoliy Koreyaga murojaat qilish shuni anglatadiki, Rossiya, aftidan, hatto eng oddiy harbiy texnikani ham o‘zi mustaqil ishlab chiqarish imkoniyatiga ega emas.

“Kreml Shimoliy Koreyadan yoki yana kimdandir artilleriya snaryadlari va raketalarni sotib olishining yagona sababi shuki, Putin Rossiya iqtisodiyotini urush uchun hatto eng oddiy darajada safarbar etishni ham xohlamaydi yoki bunday qila olmaydi”, — deb fikr bildirdi Kagan.

“Shimoliy Koreyadan umuman nimadir sotib olishga to‘g‘ri kelayotganidan Kreml tashvishga tushishi kerak”, — dedi Urush tadqiqotlari institutining Rossiya bo‘yicha ekspertlar guruhi rahbari Meyson Klark.

The New York Times qayd etishicha, Eron va Shimoliy Koreya tomonidan qurol-yarog‘ yetkazib berilayotgani Rossiyaning o‘z qurol-yarog‘ zaxiralari tugab bitganidan darak berishi mumkin.