Xitoy Tashqi ishlar vazirligi matbuot kotibi Mao Nin Pekinda bo‘lib o‘tgan brifingda mamlakat tashqi ishlar vaziri Sin Ganning uzoq vaqt davomida jamoatchilikka ko‘rinish bermayotgani haqidagi savolga javob berdi, deb yozadi “RIA Novosti”.
“Menda sizlarga bera oladigan hech qanday ma’lumot yo‘q”, — dedi u Sin Gan qayerdaligi haqida xabar bormi, degan savolga javoban.
XXR tashqi ishlar vaziri Sin Gan bir oydan beri omma oldida ko‘rinish bermadi, bu esa ommaviy axborot vositalarida ko‘plab mish-mishlarga sabab bo‘lmoqda.
Avvalroq Bloomberg agentligi manbalarga tayanib, Buyuk Britaniya tashqi ishlar vaziri Jeyms Kleverli Pekinga safarini qoldirgani, bunga Xitoy tashqi ishlar vazirining g‘oyib bo‘lishi sabab bo‘lgani haqida xabar bergandi.
Oq uy Xitoy tashqi ishlar vazirining yo‘qolishi haqidagi xabarlarga munosabat bildirib, AQSH rasmiylarida uning g‘oyib bo‘lishi sabablari haqida maʼlumot yo‘qligini bildirgan.
Sin Gan 11–15-iyul kunlari Jakartada bo‘lib o‘tgan Janubi-Sharqiy Osiyo davlatlari assotsiatsiyasi (ASEAN) tashqi ishlar vazirlarining yillik yig‘ilishida ham qatnashmagan, uning o‘rniga Indoneziyaga Xitoy kommunistik partiyasi Markaziy qo‘mitasi tashqi ishlar komissiyasi departamenti rahbari Van I ketgan. Xitoy TIV rasmiy vakilining so‘zlariga ko‘ra, Sin Gan “sog‘lig‘i sabab” Jakartadagi uchrashuvini o‘tkazib yuborgan.
Izoh (0)