AQSH ma’lumotlariga ko‘ra, Rossiya Shimoliy Koreyaga qurol-yarog‘ evaziga oziq-ovqat taklif qilish uchun Pxenyanga rasmiy delegatsiya jo‘natishni rejalashtirmoqda. Bu haqda Pentagon matbuot kotibi Jon Kirbi ma’lum qildi. U Rossiya va Shimoliy Koreya o‘rtasidagi har qanday kelishuv, jumladan, qurol-yarog‘ bitimi Birlashgan Millatlar Tashkiloti Xavfsizlik kengashi rezolyutsiyasini buzishini aytdi.
AQSH avvalroq ham KXDRni Rossiya harbiylari va “Vagner” yollanma askarlarini qurol-yarog‘ bilan ta’minlaganlikda ayblagan edi, Pxenyan esa bu ayblovlarni qat’iyan rad etgan.
Matbuot anjumanida Jon Kirbi hozir AQSHda Moskva va Pxenyan o‘rtasida tuzilishi mumkin bo‘lgan kelishuv haqida yangi maʼlumotlar borligini aytdi.
“Bilishimizcha, Rossiya Shimoliy Koreyaga delegatsiya jo‘natib, ularga o‘q-dorilar evaziga oziq-ovqat taklif qilmoqchi”, — dedi u.
“AQSH voqealar rivoji va taklif qilingan kelishuvni diqqat bilan kuzatib bormoqda”, — qo‘shimcha qildi Kirbi.
30-mart kuni AQSH Moliya vazirligi Moskva va Pxenyan o‘rtasidagi muzokaralarda vositachilik qilgan Slovakiya fuqarosi Ashot Mkrtichevni qora ro‘yxatga kiritgan edi. Vazirlik vakillarining taʼkidlashicha, Mkrtichev shu vaqtgacha bir qator bitimlar va savdolarni tashkillashtirgan, bu esa Shimoliy Koreyaga 2022-yil oxiri — 2023-yil boshida valyuta, fuqarolik samolyotlari, tovarlar va xomashyo evaziga Rossiyaga qurol jo‘natish imkonini bergan.
Izoh (0)