Shohrux Xon 30 yildan ortiq umrini san’atga bag‘ishladi. Bollivud qiroli, iste’dodda tengsiz aktyor tomoshabinlarni hayron qoldirishda davom etmoqda. Yil boshida prokatga chiqqan “Pathan” jangovar filmi ko‘plab loyihalarni ortda qoldirdi. Bollivudda uning vorisi paydo bo‘ldi, aktyorning qizi Suhana Xon ham hind kino olamini zabt etdi.
Shohrux va uning rafiqasi Gauri Xon uch nafar farzand: o‘g‘illari Aryan, Abram va qizi Suhanani tarbiyalab, voyaga yetkazdi.
Suhana 2000-yilning 22-may sanasida tug‘ilgan. Qizaloq ko‘p qirrali shaxs sifatida voyaga yetdi. U raqs va sportni yaxshi ko‘rardi, hikoyalar yozardi va otasi bilan tez-tez kriket musobaqalarida qatnashardi. U maktab yillarida taekvondo bilan shug‘ullangan, futbol jamoasi sardori bo‘lgan, turnirlarda g‘olib chiqqan. Bo‘lajak aktrisa nufuzli Dhirubhaya Ambani maktabida o‘qigan, keyinchalik Angliyadagi boy insonlarning farzandi tahsil oladigan maktab-internatga o‘qishga kirdi.
2018-yilda Suhana Vogue India jurnalining avgust soni muqovasida chiqqanidan so‘ng Bollivuddagi qarindosh-urug‘chilik haqidagi qizg‘in muhokamalarga sabab bo‘ldi. Jurnalda hali kino olamida debyut qilmagan 18 yoshli qiz “talaba, teatr ishqibozi va bo‘lajak yulduz” deb ta’riflangan.
Shohrux Xonning qizi “mashhurlarning farzandi Bollivudni egallab olgani” va umuman olganda, filmlarda rol o‘ynamagan va hayotida hech narsa qilmagan bo‘lsa ham, jurnal muqovasida chiqqani uchun salbiy muhokamalarga sabab bo‘ldi. Aytgancha, o‘sha yilning iyun oyida Vogue muqovasida marhum aktrisa Shridevining qizi Janvi Kapurning ham surati chiqqan edi. Biroq u tashqi ko‘rinishi sabab bunday muhokamalarga sabab bo‘lmadi.
Suhana Vogue jurnaliga bergan o‘sha intervyusida bolaligidan jurnalistlar va paparatsilarning e’tiboridan nafratlanishi haqida so‘zlab bergan. “Bizning oilamiz qandaydir boshqacha ekanini juda erta anglagandim. Biroq otam qanchalik mashhur inson ekanligi haqida umuman o‘ylamaganman. Besh yoshligimda u mashinani tez-tez haydab maktabdan olib ketardi.
Insonlar uni barmoqlari bilan ko‘rsatib, qarab turishardi. Unga boshqa bolalarning otasi kabi murojaat qilishmasdi, men esa buni juda xohlardim. Qo‘rqib ketdim va nima uchun bunday qilishayotganini tushunmasdim. U meni quchoqlashni xohlardi, men esa uni mashinaga itarib yuborardim. Men e’tiborni yomon ko‘rardim va o‘zimni ushlab turardim”, — deydi Suhana.
Biroq Suhana bolaligidan aktrisa bo‘lishni orzu qilgan.
“Ota-onam birinchi chiqishlarimni ko‘rganlaridayoq, aktyorlikka jiddiy yondashganimni tushunishdi. Men maktabdagi ‘Bo‘ron’ spektaklida Miranda rolini o‘ynagandim. Kollejda Shekspirning mashhur tragediyasida Julyetta rolini ijro etganman. Mening sahna ko‘rinishidagi ishtirokimni ko‘rish uchun otam ataylab Angliyaga uchib borgan edi”, — deydi Suhana.
U kollejda tahsil olganidan so‘ng Nyu-York san’at universitetida o‘qidi. U yerda aktyorlik va sahna aktyorligi bo‘yicha tahsil oldi. Suhana 19 yoshida 10 daqiqalik “Kulrang — ko‘kning bir qismi” qisqa metrajli filmida aktrisa sifatida debyut qildi. Bu loyiha o‘zaro munosabatlardagi muammolarni hal qilish uchun sayohatga chiqqan yosh juftlik haqida hikoya qilardi.
Film YouTube’da 2 milliondan ortiq tomosha qilindi va yosh aktrisaning faoliyati birorta salbiy izohga sabab bo‘lmadi. Aslida, Suhanadan bunday yuqori saviyadagi ijroni hech kim kutmagandi.
Tomoshabinlar Shohrux Xonning qizini tasvirlashga so‘z topa olmadi. Ular qizning tashqi ko‘rinishi otasiga o‘xshashini, uning mahorati va iste’dodi eng yuqori darajada ekanini ta’kidladi. Shohrux Xon qizining Bollivudda muvaffaqiyatga erishishida hech qanday yordam bermadi.
“Men qizimning yulduz bo‘lishini istamayman. Men u aktyorlikni o‘rganib, yaxshi aktrisa bo‘lganida Bollivudga kelishini xohlayman. U o‘z yo‘lini topishi kerak”, — deydi aktyor.
Aktyor kutganidek bo‘ldi. Suhana 2022-yilning dekabr oyida rejissor Zoya Axtar tomonidan suratga olingan “Archi” birinchi filmida suratga tushdi. Bu loyiha Archi komikslariga asoslangan mashhur “Riverdeyl” serialining hind tilidagi moslashuvi. Serialning premyerasi Netflix’da bo‘lib o‘tadi.
Filmda Suhanadan tashqari Amitabh Bachchanning nabirasi Agastya Nanda va Shridevining qizi Kxushi Kapur ham rol o‘ynagan. Shuningdek, loyihada Vedang Rayna, Dot, Yuvraj Menda va Mihir Axuja ishtirok etgan.
Suhananing shaxsiy hayotiga kelsak, bir vaqtlar u Chanki Pandeyning jiyani Ohan Pandey bilan munosabatda bo‘lgan. Juftlikni ko‘pincha kafe va kinoteatrlarda birga ko‘rishardi. Biroq ular shunchaki yaxshi do‘st ekanligini da’vo qilishgan. Suhana Ohanning amakivachchasi Ananya Pandey bilan yaqin do‘st.
2022-yilning oxirida ommaviy axborot vositalarida Suhana Amitabh Bachchanning nabirasi bilan uchrashayotganligi haqida xabar tarqaldi. Hindustan Times gazetasining yozishicha, Agastya Suhanani Kapurlar oilasi tomonidan tashkil etilgan kechki ovqatga olib borgan va uni barcha oila a’zolariga o‘zining sevgilisi sifatida tanishtirgan. Juftlik 2022-yilning avgust oyidan beri birga, biroq ular munosabatlarini rasmiylashtirishga shoshilmayapti.
Agar bu haqiqatan ham rost bo‘lsa, Shohrux Xonning oilasi tez orada Bollivudning ikkita buyuk sulolasiga qarindosh bo‘lib qolishi mumkin, chunki Agastya nafaqat Amitabx Bachchanning nabirasi, balki afsonaviy Raj Kapurning nevarasi hisoblanadi.
Izoh (0)