Шоҳрух Хон 30 йилдан ортиқ умрини санъатга бағишлади. Болливуд қироли, истеъдодда тенгсиз актёр томошабинларни ҳайрон қолдиришда давом этмоқда. Йил бошида прокатга чиққан “Патҳан” жанговар фильми кўплаб лойиҳаларни ортда қолдирди. Болливудда унинг вориси пайдо бўлди, актёрнинг қизи Суҳана Хон ҳам ҳинд кино оламини забт этди.
Шоҳрух ва унинг рафиқаси Гаури Хон уч нафар фарзанд: ўғиллари Арян, Абрам ва қизи Суҳанани тарбиялаб, вояга етказди.
Суҳана 2000 йилнинг 22 май санасида туғилган. Қизалоқ кўп қиррали шахс сифатида вояга етди. У рақс ва спортни яхши кўрарди, ҳикоялар ёзарди ва отаси билан тез-тез крикет мусобақаларида қатнашарди. У мактаб йилларида таэквондо билан шуғулланган, футбол жамоаси сардори бўлган, турнирларда ғолиб чиққан. Бўлажак актриса нуфузли Дҳирубҳая Амбани мактабида ўқиган, кейинчалик Англиядаги бой инсонларнинг фарзанди таҳсил оладиган мактаб-интернатга ўқишга кирди.
2018 йилда Суҳана Vogue India журналининг август сони муқовасида чиққанидан сўнг Болливуддаги қариндош-уруғчилик ҳақидаги қизғин муҳокамаларга сабаб бўлди. Журналда ҳали кино оламида дебют қилмаган 18 ёшли қиз “талаба, театр ишқибози ва бўлажак юлдуз” деб таърифланган.
Шоҳрух Хоннинг қизи “машҳурларнинг фарзанди Болливудни эгаллаб олгани” ва умуман олганда, фильмларда рол ўйнамаган ва ҳаётида ҳеч нарса қилмаган бўлса ҳам, журнал муқовасида чиққани учун салбий муҳокамаларга сабаб бўлди. Айтганча, ўша йилнинг июнь ойида Vogue муқовасида марҳум актриса Шридевининг қизи Жанви Капурнинг ҳам сурати чиққан эди. Бироқ у ташқи кўриниши сабаб бундай муҳокамаларга сабаб бўлмади.
Суҳана Vogue журналига берган ўша интервьюсида болалигидан журналистлар ва папарациларнинг эътиборидан нафратланиши ҳақида сўзлаб берган. “Бизнинг оиламиз қандайдир бошқача эканини жуда эрта англагандим. Бироқ отам қанчалик машҳур инсон эканлиги ҳақида умуман ўйламаганман. Беш ёшлигимда у машинани тез-тез ҳайдаб мактабдан олиб кетарди.
Инсонлар уни бармоқлари билан кўрсатиб, қараб туришарди. Унга бошқа болаларнинг отаси каби мурожаат қилишмасди, мен эса буни жуда хоҳлардим. Қўрқиб кетдим ва нима учун бундай қилишаётганини тушунмасдим. У мени қучоқлашни хоҳларди, мен эса уни машинага итариб юборардим. Мен эътиборни ёмон кўрардим ва ўзимни ушлаб турардим”, — дейди Суҳана.
Бироқ Суҳана болалигидан актриса бўлишни орзу қилган.
“Ота-онам биринчи чиқишларимни кўрганларидаёқ, актёрликка жиддий ёндашганимни тушунишди. Мен мактабдаги ‘Бўрон’ спектаклида Миранда ролини ўйнагандим. Коллежда Шекспирнинг машҳур трагедиясида Жульетта ролини ижро этганман. Менинг саҳна кўринишидаги иштирокимни кўриш учун отам атайлаб Англияга учиб борган эди”, — дейди Суҳана.
У коллежда таҳсил олганидан сўнг Нью-Йорк санъат университетида ўқиди. У ерда актёрлик ва саҳна актёрлиги бўйича таҳсил олди. Суҳана 19 ёшида 10 дақиқалик “Кулранг — кўкнинг бир қисми” қисқа метражли фильмида актриса сифатида дебют қилди. Бу лойиҳа ўзаро муносабатлардаги муаммоларни ҳал қилиш учун саёҳатга чиққан ёш жуфтлик ҳақида ҳикоя қиларди.
Фильм YouTube’да 2 миллиондан ортиқ томоша қилинди ва ёш актрисанинг фаолияти бирорта салбий изоҳга сабаб бўлмади. Аслида, Суҳанадан бундай юқори савиядаги ижрони ҳеч ким кутмаганди.
Томошабинлар Шоҳрух Хоннинг қизини тасвирлашга сўз топа олмади. Улар қизнинг ташқи кўриниши отасига ўхшашини, унинг маҳорати ва истеъдоди энг юқори даражада эканини таъкидлади. Шоҳрух Хон қизининг Болливудда муваффақиятга эришишида ҳеч қандай ёрдам бермади.
“Мен қизимнинг юлдуз бўлишини истамайман. Мен у актёрликни ўрганиб, яхши актриса бўлганида Болливудга келишини хоҳлайман. У ўз йўлини топиши керак”, — дейди актёр.
Актёр кутганидек бўлди. Суҳана 2022 йилнинг декабрь ойида режиссёр Зоя Ахтар томонидан суратга олинган “Арчи” биринчи фильмида суратга тушди. Бу лойиҳа Арчи комиксларига асосланган машҳур “Ривердейл” сериалининг ҳинд тилидаги мослашуви. Сериалнинг премьераси Netflix’да бўлиб ўтади.
Фильмда Суҳанадан ташқари Амитабҳ Баччаннинг набираси Агастя Нанда ва Шридевининг қизи Кхуши Капур ҳам рол ўйнаган. Шунингдек, лойиҳада Веданг Райна, Дот, Ювраж Менда ва Миҳир Ахужа иштирок этган.
Суҳананинг шахсий ҳаётига келсак, бир вақтлар у Чанки Пандейнинг жияни Оҳан Пандей билан муносабатда бўлган. Жуфтликни кўпинча кафе ва кинотеатрларда бирга кўришарди. Бироқ улар шунчаки яхши дўст эканлигини даъво қилишган. Суҳана Оҳаннинг амакиваччаси Ананя Пандей билан яқин дўст.
2022 йилнинг охирида оммавий ахборот воситаларида Суҳана Амитабҳ Баччаннинг набираси билан учрашаётганлиги ҳақида хабар тарқалди. Hindustan Times газетасининг ёзишича, Агастя Суҳанани Капурлар оиласи томонидан ташкил этилган кечки овқатга олиб борган ва уни барча оила аъзоларига ўзининг севгилиси сифатида таништирган. Жуфтлик 2022 йилнинг август ойидан бери бирга, бироқ улар муносабатларини расмийлаштиришга шошилмаяпти.
Агар бу ҳақиқатан ҳам рост бўлса, Шоҳрух Хоннинг оиласи тез орада Болливуднинг иккита буюк сулоласига қариндош бўлиб қолиши мумкин, чунки Агастя нафақат Амитабх Баччаннинг набираси, балки афсонавий Раж Капурнинг невараси ҳисобланади.
Изоҳ (0)