“Lag‘mon yeyishga kelaman dedi” — Prezidentni mehmon qilgan xonadon egasi

Prezident Shavkat Mirziyoyev kecha, 21-iyul kuni Toshkent shahrining Olmazor tumanidagi “Xastimom” mahallasida bo‘ldi. Davlat rahbari mahalladagi xonadonlarda bo‘lib, aholining yashash sharoitini ko‘rdi. Shu mahallada yashovchi Eldo‘st aka va Dilbar opa xonadonida mehmon bo‘lib, bir piyola choy ustida suhbat qurdi. “Daryo” muxbiri prezidentni mehmon qilgan xonadon vakillari bilan suhbatlashdi.

“Prezidentimizning biznikiga kelishi biz uchun baxt bo‘ldi. Buni tasavvur ham qilib bo‘lmaydi. Lekin biror kuni O‘zbekiston prezidenti bilan ko‘rishishni niyat qilardim. Ko‘rishdim, xonadonimizga keldi”, — deydi O‘zbekiston prezidenti mehmon bo‘lgan xonadon bekasi Dilbar Abdullaboyeva.

Xonadon bekasi Dilbar opaning aytishicha, davlat rahbarining samimiyligi ularni hayratga solgan.

“Juda samimiy ekan. Davlat rahbariman, yurtboshiman degan gap yo‘q. Samimiy suhbatlashganlari sari biz ham erkin bo‘lib, bor gapimizni bemalol ayta oldik”, — deydi xonadon bekasi.

Dilbar opa va Eldo‘st akalarning aytishicha, ularning ikki nafar kelini va to‘rt nafar nabirasi bor.

“Prezidentimiz sizlarning fikrlaringizni bilish uchun ham shaxsan o‘zim keldim deganlaridan so‘ng, mahallamizdagi xonadonlar juda tor joyda joylashganini, imkoni bo‘lsa bolalarimizning alohida yashashlari uchun imkoniyat yaratib berilsa degan takliflarni berdim”, — deydi Dilbar opa.

Xonadon egalarining aytishicha, prezident ularning xonadoniga kirib kelganda davlat rahbarini ularning qizi 9-sinf o‘quvchisi Dilshoda kutib olgan.

“Dastlab uyga kirib kelganlarida hovlimizdagi qushlar haqida so‘rab, ularni kim boqadi dedi. Mening o‘sha paytdagi holatimni so‘z bilan tasvirlab berish juda mushkul”, — deydi Dilshoda.

“Xastimom” mahalla fuqarolar yig‘ini raisi Sanoat Yahyoyevaning aytishicha, prezident Dilbar opa va Eldo‘st akaning xonadoniga ishora qilib, “shundoq tor joylarda kelin olishingiz, qiz uzatishingiz to‘g‘ri kelmaydi, xo‘p desangiz, sizlarni rozi qilgan holda muammolarni hal qilamiz”, degan.

Davlat rahbarini bir soat mehmon qilgan Dilbar Abdullaboyeva Shavkat Mirziyoyev keyingi safar lag‘mon yeyishga, yana mehmonga kelishini aytgan.

“Agar yana o‘tirganlarida osh ham, lag‘mon ham qilib berardim. Men yana kelaman lag‘mon yeyishga deb vaʼda berdilar”, — deydi Dilbar opa.