“Лағмон ейишга келаман деди” — Президентни меҳмон қилган хонадон эгаси

Президент Шавкат Мирзиёев кеча, 21 июль куни Тошкент шаҳрининг Олмазор туманидаги “Хастимом” маҳалласида бўлди. Давлат раҳбари маҳалладаги хонадонларда бўлиб, аҳолининг яшаш шароитини кўрди. Шу маҳаллада яшовчи Элдўст ака ва Дилбар опа хонадонида меҳмон бўлиб, бир пиёла чой устида суҳбат қурди. “Дарё” мухбири президентни меҳмон қилган хонадон вакиллари билан суҳбатлашди.

“Президентимизнинг бизникига келиши биз учун бахт бўлди. Буни тасаввур ҳам қилиб бўлмайди. Лекин бирор куни Ўзбекистон президенти билан кўришишни ният қилардим. Кўришдим, хонадонимизга келди”, — дейди Ўзбекистон президенти меҳмон бўлган хонадон бекаси Дилбар Абдуллабоева.

Хонадон бекаси Дилбар опанинг айтишича, давлат раҳбарининг самимийлиги уларни ҳайратга солган.

“Жуда самимий экан. Давлат раҳбариман, юртбошиман деган гап йўқ. Самимий суҳбатлашганлари сари биз ҳам эркин бўлиб, бор гапимизни бемалол айта олдик”, — дейди хонадон бекаси.

Дилбар опа ва Элдўст акаларнинг айтишича, уларнинг икки нафар келини ва тўрт нафар набираси бор.

“Президентимиз сизларнинг фикрларингизни билиш учун ҳам шахсан ўзим келдим деганларидан сўнг, маҳалламиздаги хонадонлар жуда тор жойда жойлашганини, имкони бўлса болаларимизнинг алоҳида яшашлари учун имконият яратиб берилса деган таклифларни бердим”, — дейди Дилбар опа.

Хонадон эгаларининг айтишича, президент уларнинг хонадонига кириб келганда давлат раҳбарини уларнинг қизи 9-синф ўқувчиси Дилшода кутиб олган.

“Дастлаб уйга кириб келганларида ҳовлимиздаги қушлар ҳақида сўраб, уларни ким боқади деди. Менинг ўша пайтдаги ҳолатимни сўз билан тасвирлаб бериш жуда мушкул”, — дейди Дилшода.

“Хастимом” маҳалла фуқаролар йиғини раиси Саноат Яҳёеванинг айтишича, президент Дилбар опа ва Элдўст аканинг хонадонига ишора қилиб, “шундоқ тор жойларда келин олишингиз, қиз узатишингиз тўғри келмайди, хўп десангиз, сизларни рози қилган ҳолда муаммоларни ҳал қиламиз”, деган.

Давлат раҳбарини бир соат меҳмон қилган Дилбар Абдуллабоева Шавкат Мирзиёев кейинги сафар лағмон ейишга, яна меҳмонга келишини айтган.

“Агар яна ўтирганларида ош ҳам, лағмон ҳам қилиб берардим. Мен яна келаман лағмон ейишга деб ваъда бердилар”, — дейди Дилбар опа.