Facebook’dagi Caught In Providence kanalida amerikalik huquqshunos, adolati bilan dunyoga mashhur bo‘lgan sudya Frank Kaprio o‘zbekistonlik Muhammadodilbek Obidjonovni mahkamada so‘roq qilgani aks etgan video joylandi.
Sud zalidagi suhbatda Frank Kaprio Muhammadodilbek yo‘l harakatiga to‘sqinlik qilganlikda ayblanayotganini aytgan.
Ayblanuvchi: “bu kvartiraga ko‘chib o‘tishimdan oldin, rahbariyat menga o‘sha yerda mashinamni ‘parkovka’ qilishimni, muammo bo‘lmasligini aytdi va men u yerda to‘xtashga odatlangan mashinalarni ko‘rdim. Men chipta olgan yagona mashina egasi edim, boshqa ikkita mashina esa hech narsaga (chiptaga) ega emasdi”, — deya holatni izohlagan.
Sudya unga mazkur xatosi uchun 35 dollar jarima qo‘llagan.
Samimiy suhbat davomida sudya Muhammadodilbek ismini talaffuz qilishga qiynalganini aytadi. Undan qayerlik ekanini so‘raydi. Qancha vaqtdan beri bu yerdasan, degan savolga, o‘zbekistonlik yigit: “bu yerga o‘tgan yili keldim. Amerikadagi Johnson and Wales universiteti talabasiman. Sport menejmenti bilan biznes boshqaruvining magistraturasida o‘qiyman”, — deya javob bergan.
Suhbat davomida Frank Kaprio “keyinchalik o‘z vataningga qaytmoqchimisan yoki shu yerda qolasanmi”, deb so‘raydi.
“Mening bir nechta rejalarim bor. Oldin professional futbolchi bo‘lganman. Shuning uchun o‘z agentligimni ochmoqchiman. Bu o‘yinchilarga hisoblash va boshqa ishlarda yordam beradi”, — deya javob qilgan Muhammadodilbek.
Shu bilan birga, sudya sizning mamlakatingiz va AQSH o‘rtasidagi katta farq nimada, deya ayblanuvchini savolga tutadi.
“Men mamlakatimda hech qachon yashamaganman, chunki Rossiyada futbol bilan shug‘ullanishimdan oldin bakalavr darajasini Yevropada tamomlaganman. Yaʼni O‘zbekistonda tug‘ilganman xolos. Hayotimning deyarli ko‘p qismi mamlakatdan tashqarida o‘tgan”, — degan sudlanuvchi.
Muhammadodilbek sudyaning ingliz tilini qanday qilib o‘rgangani haqidagi savoliga javoban, tilni Rossiyada, o‘rta maktabda o‘rganganini aytgan.
Maʼlumot uchun, Frank Kaprio AQSHning Rod-Aylend shtati Providens shahridagi bosh munitsipal sudyasi bo‘lib, dunyodagi eng adolatli sudya deya taʼriflanadi. Kaprio raisligidagi sud majlislari suratga olinadi va ularni butun dunyo bo‘ylab millionlab odamlar tomosha qiladi. U mayda jinoyatlar va yo‘l harakati qoidalarini buzish holatlarini ko‘rib chiqadi. Kaprio raislik qilgan sud jarayonlari 20 yildan ortiq vaqt davomida mahalliy televideniye orqali namoyish etilgan.
Izoh (0)