Prezident Shavkat Mirziyoyev kecha, 21-iyul kuni Toshkent shahrining Olmazor tumanidagi “Xastimom” mahallasida bo‘ldi. Davlat rahbari mahalladagi xonadonlarda bo‘lib, aholining yashash sharoitini ko‘rdi. Odamlar bilan samimiy suhbatlashdi. “Daryo” muxbiri prezident Shavkat Mirziyoyev bilan suhbatda bo‘lganlarni savolga tutdi.
Prezidentimiz bilan suhbatimiz yumorga boy bo‘ldi. Ularning “bu jin ko‘chalarda qiz ham berolmaysiz, kelin ham ololmaysiz”, deya “barcha sharoitlarni yaratib beramiz deganlari”, bizga juda yoqdi. Davlat rahbari har birimiz bilan suhbatlashar ekan, “nima muammo borligini o‘zingizning tilingizdan eshitish uchun keldim”, dedi. Prezidentimiz bilan suhbat shu qadar oddiy va samimiy ediki, men hatto televizordagi Saida Rametovaning “Achovotdanmi, qizimni bermayman”, degan gaplarigacha esladim. Prezidentimiz bu holatga kulib, “to‘g‘ri aytasiz”, dedilar, — deydi davlat rahbari bilan suhbatda bo‘lgan Shohida Nishonova.
Suhbatdoshning aytishicha, Shavkat Mirziyoyev eski shahar aholisining oddiy va samimiyligini, sabrliligini aytib, muammolar haqida ham so‘ragan.
Bizning ko‘chamizda kanalizatsiya tizimi yo‘qligini, sharoitimiz og‘ir, ko‘plab xonadonlarda ikki-uch nafar kelinlari bilan sabr qilib yashab kelayotganini aytdim. Prezidentimiz bunga javoban aholiga sharoit yaratib berilishini, ayniqsa yoshlarning alohida yashashlari uchun imkoniyat yaratib berilishini bildirdi. Har bir muammoimizni sabr bilan eshitib, biz bilan oddiy odamlardek samimiy suhbat qilishlarini ko‘rib, xursand bo‘ldim. Shaxsan men o‘zimni baxtli hisoblayman. Prezident bilan suhbatlashib, muammolarimni aytdim. Shu sababmi hayajondan kechasi bilan uxlolmay chiqdim, — deydi suhbatdosh.
Shohida opaning aytishicha, davlat rahbarining eski shaharga tashrifi aholining kayfiyatini ko‘tarib, har bir xonadonda bayramona kayfiyat paydo bo‘lishiga olib kelgan.
Mahallamizga kelgan prezidentimiz yo‘lma-yo‘l hamma bilan birma-bir so‘rashib chiqdi. Nuroniylar bilan samimiy suhbat qurdi. Bu bizga kuch berib, kayfiyatimizni ko‘tardi, — deydi suhbatdosh.
Prezident bilan ko‘rishgan Ismog‘il ota Saidmahmudovning aytishicha, davlat rahbarining odamlar bilan samimiy suhbati va har xonadonga kirib, muammolar haqida so‘rashi boshqa rahbarlarning ham ijobiy xulosa qilishiga sabab bo‘lib, ularni xalq bilan yaqinlashtiradi.
Prezidentimiz mahallamizga kelar ekan, eng avvalo meni maqtamang, barchasi haqida ro‘yi-rost gapiring deya alohida urg‘u berdi. Biz ham shu sabab barcha gapni ochiq oydin gapirdik. Suhbat juda samimiy va kulgiga boy bo‘ldi, — deydi Ismog‘il ota Saidmahmudov.
Otaxonning aytishicha, davlat rahbari muammo haqida so‘ragach, mahalla aholisi ko‘chalar juda torligini, kichkina uylarda 4-5 ta oilalar yashayotganini aytib, yordam so‘ragan. Prezident bunga javoban mahalla aholisi yashayotgan va xonadon vakillari rozi bo‘lsa, tor joydagi uylar buzilib, yangilanishini aytgan. Uyimiz o‘zimizga maʼqul deganlarga esa o‘z uyi qoldiriladi degan.
“Xastimom” mahalla fuqarolar yig‘ini raisi Sanoat Yahyoyevaning maʼlumot berishicha, u prezident bilan muloqotda Shavkat Mirziyoyev Bosh vazir bo‘lgan paytda “Xastimom” majmuasi qurilishiga shaxsan o‘zi bosh-qosh bo‘lganini, hududni obodonlashtirishda u kishining hissasi katta bo‘lganini eslatgan.
Prezidentimiz Bosh vazir bo‘lgan paytda “Xastimom” majmuasi qurilishiga shaxsan o‘zlari bosh-qosh bo‘lgandi. Men o‘sha paytda mahalla idorasida kotiba bo‘lib ishlardim. O‘shanda Shavkat Mirziyoyevning kechani kecha kunduzni kunduz demay ishlashlarini, g‘ayratlarini ko‘rib, yaxshi xislatlarini o‘rganganimni aytdim. Avvaldan taniganim, ko‘rganim, o‘sha paytda birga ishlaganim uchunmi davlat rahbari bilan suhbatimiz anchayin samimiy bo‘ldi, — deydi MFY raisi Sanoat Yahyoyeva.
Prezident axborot xizmatining yozishicha, “Xastimom” mahallasida 1 ming 500 nafardan ziyod aholi yashaydi. Ularning ko‘pchiligi hunarmandchilik va savdo bilan shug‘ullanadi.
Mamlakatimizning barcha hududlarida “Obod mahalla”, “Obod qishloq” dasturlari amalga oshirilmoqda. Yo‘llar, muhandislik tarmoqlari taʼmirlanib, xonadonlarga fayz kirmoqda. Bu mahallani ham “Obod xonadon” dasturi asosida yaxshilash ko‘zda tutilmoqda, — deyiladi prezident matbuot xizmati tarqatgan xabarda.
Izoh (0)