O‘zbekiston elchixonasi ko‘magida sog‘liqni saqlash vaziri Amrillo Inoyatov va Italiyaning Lombardiya sog‘liqni saqlash hududiy maslahatchisi Gvido Bertolaso o‘rtasida onlayn uchrashuv tashkil etildi, deb xabar bermoqda “Dunyo” AA.
Elchi Otabek Akbarov Lombardiya hududi sog‘liqni saqlash sohasida ilg‘or zamonaviy tajribaga egaligini qayd etgan holda, O‘zbekiston uchun Italiya tajribasini joriy qilish muhimligini bildirdi.
Amrillo Inoyatov O‘zbekiston tibbiyot, tibbiy taʼlim va farmatsevtika sohalarida Italiya tajribasini joriy etish maqsadida bir qator muhim takliflar, jumladan ikki mamlakat soha vakillari, yetakchi kompaniyalari ishtirokida O‘zbekistonda tibbiyot va farmatsevtika sanoati forumini tashkil etish tashabbusini bildirdi.
Sog‘liqni saqlash vaziri O‘zbekistonda mavjud sog‘liqni saqlash tizimini yanada rivojlantirish bo‘yicha tegishli uchrashuv va muzokaralar o‘tkazish maqsadida Lombardiya delegatsiyasini tashrif bilan kelishga taklif qildi.
Lombardiya sog‘liqni saqlash hududiy maslahatchisi Gvido Bertolaso bildirilgan takliflarni katta qiziqish bilan qabul qilib, Lombardiya ilg‘or tajribasini O‘zbekistonda joriy etish bo‘yicha o‘zaro hamkorlik qilishga tayyor ekanini maʼlum qildi.
Gvido Bertolasoning aytishicha, Lombardiya sog‘liqni saqlash tizimi innovatsion tibbiy va jarrohlik texnologiyalari keng qo‘llanilishi, shifokorlarni o‘qitishning zamonaviy usullaridan foydalanish hamda ilmiy izlanishlar olib borilishi bilan ajralib turadi.
Uchrashuv yakunida muhokama qilingan masalalar ijrosi bo‘yicha “Yo‘l xarita”sini ishlab chiqish yuzasidan kelishuvga erishildi.
Izoh (0)