Ўзбекистон элчихонаси кўмагида соғлиқни сақлаш вазири Амрилло Иноятов ва Италиянинг Ломбардия соғлиқни сақлаш ҳудудий маслаҳатчиси Гвидо Бертоласо ўртасида онлайн учрашув ташкил этилди, деб хабар бермоқда “Дунё” АА.
Элчи Отабек Акбаров Ломбардия ҳудуди соғлиқни сақлаш соҳасида илғор замонавий тажрибага эгалигини қайд этган ҳолда, Ўзбекистон учун Италия тажрибасини жорий қилиш муҳимлигини билдирди.
Амрилло Иноятов Ўзбекистон тиббиёт, тиббий таълим ва фармацевтика соҳаларида Италия тажрибасини жорий этиш мақсадида бир қатор муҳим таклифлар, жумладан икки мамлакат соҳа вакиллари, етакчи компаниялари иштирокида Ўзбекистонда тиббиёт ва фармацевтика саноати форумини ташкил этиш ташаббусини билдирди.
Соғлиқни сақлаш вазири Ўзбекистонда мавжуд соғлиқни сақлаш тизимини янада ривожлантириш бўйича тегишли учрашув ва музокаралар ўтказиш мақсадида Ломбардия делегациясини ташриф билан келишга таклиф қилди.
Ломбардия соғлиқни сақлаш ҳудудий маслаҳатчиси Гвидо Бертоласо билдирилган таклифларни катта қизиқиш билан қабул қилиб, Ломбардия илғор тажрибасини Ўзбекистонда жорий этиш бўйича ўзаро ҳамкорлик қилишга тайёр эканини маълум қилди.
Гвидо Бертоласонинг айтишича, Ломбардия соғлиқни сақлаш тизими инновацион тиббий ва жарроҳлик технологиялари кенг қўлланилиши, шифокорларни ўқитишнинг замонавий усулларидан фойдаланиш ҳамда илмий изланишлар олиб борилиши билан ажралиб туради.
Учрашув якунида муҳокама қилинган масалалар ижроси бўйича “Йўл харита”сини ишлаб чиқиш юзасидан келишувга эришилди.
Изоҳ (0)